El 16 d’ochobre tolos siguidores del ska tienen una cita imprescindible n’Asturies. Skama la Rede ye’l grupu convidáu p’actuar xunto a Bad Manners, formación inglesa fundada en 1976 y que ye ún de los nomes referenciales del movimientu sonoru de la música ska nomáu two-tone. La banda aporta a la sala Estilo d’Uviéu dientro de la xira 50 aniversariu que los va llevar a ocho ciudaes del Estáu español y na que n’Asturies los lluanco-candasinos-maliayos van poner enriba l’escenariu más de venti años de ska-punk. Les entraes yá tán a la venta online por 25 euros.
Amás d’esti conciertu, la formación ska-punk ta d’actualidá a cuenta de la publicación del so próximu trabayu col que van festexar más de venti años de carrera. L’álbum va incluyir cantares nuevos -como ‘Escuela Asturiana‘, estrenada el mayu pasáu nel marcu de les movilizaciones del profesoráu de la educación pública- y una actualización de les canciones del 2019 que grabaron pero nun s’enxertaron en nengún discu físcu. Pa ello, dalgunes de les voces más conocíes de la escena asturiana collaboraron na grabación.
La música va publicase en vinilu y va dir acompañada d’un llibru que contién una esbilla de semeyes, entraes, carteles y recortes de prensa -sobremanera de la dómina primera de Skama La Rede-, amás de testos de xente cercano a la banda. Tamién el grupu anuncia que’l mes qu’entra van «grabar un videoclip con otru de los cantares nuevos».
«Marcháronnos los plazos un poco de les manes. Si nun yera una cosa, yera la otra. L’autoxestión superónos pero bono, yá ta ehí«, desplica Burilo en rellación al retrasu del llanzamentu del discu. Sicasí, yá nun va haber más: «Yá recibimos les primeres pruebes del vinilu y el llibru ta cuasi rematáu. Sal primero d’acabar esti añu, de xuru».
Suscríbite a les nuestres novedaes
