Del 19 al 21 son en Piloña les V Xornaes del Vigulín Tradicional y la organización del eventu yá presentó’l cartelu y la programación. Presentaciones de llibros, conciertos, sesiones vigulineres, cursos, taller d’educación musical temprana, alcuentru de vigulín asturianu y baille’l país formen les actividaes a lo llargo de trés díes.
La programación entama’l vienres 19 a les 17.30h na Casa la Cultura de L’Infiestu coles presentaciones de llibros Co violino ao carrelo d’Alexandre Cadarso y El vigulín n’Asturies, obra coordinada por Marta Fernández Vilar y Eduardo Viñuela y editada por el proyecto Culturality en colaboración con la Cátedra de Patrimonio Inmaterial de la UNESCO, que vien acompañada tamién d’un discu. Pela nueche en La Benéfica son los conciertos del grupu folk Corquiéu y de los bretones Jacky Molard y Jean-Michel Veillon. N’acabando, la Cervecería La Traviesa acueye una sesión vigulinera.
El sábadu 20 nel CFP El Prial de L’Infiestu los mentaos Jacky Molard (vigulín) y Jean-Michel Veillon (flauta) van poner los dos cursos independientes de vigulín y flauta que van desendolcase nel mesmu horariu: de 10.30h a 13.30h y de 16.30h a 18h. La edá mínima pa participar nellos ye de 10 años, la inscripción tien un preciu de 60 euros y pue facese unviando un corréu a xornaesvigulin@gmail.com. Esi día tamién se celebren les III Alcuentru de Folclor de L’Infiestu y a la nueche hai otra jam session de vigulín en La Traviesa.
El domingu 21 a les 10.30h ye’l taller d’educación temprana musical col Proyecto Concertino y Dolfu R. Fernández va impartir el taller d’iniciación al vigulín asturianu el domingu a les 11h. Pa participar nos talleres nun se requier nengún tipu de formación previa, el preciu ye a la voluntá y namás ye necesario inscribise per corréu al taller d’educación temprana musical; el de vigulín ye abiertu.
La programación zárrase’l domingu 21 a les doce y cuartu la mañana col Alcuentru del Vigulín Asturianu nel CFP El Prial, que va tar siguíu de música y baille’l país en La Benéfica a la hora’l vermú. D’esta manera, complétase la programación d’un eventu únicu nel calendariu asturianu que dende hai cuatro años vien puxando pola tradición del vigulín nel país.
Suscríbite a les nuestres novedaes
