La Dirección Xeneral d’Acción Cultural y Normalización Llingüística del Principáu d’Asturies anunció a finales de 2023 la convocatoria de les nueves ayudes p’actividaes de normalización llinguïstica n’asturianu y n’eonaviegu y pa proyectos culturales singulares a desenvolver, prioritariamente, nel ámbitu rural. La primer d’estes ayudes tien un presupuestu de 120.000 euros y el plazu pa pidiles remata’l 16 de xineru, mientres que la segunda ta dotada de 300.000 euros y pueden solicitase hasta’l 26 de xineru. Proyectos musicales de distintu calter pueden presentase a les dos convocatories.
«Espectáculos artísticos en cualesquier disciplina, nos que la llingua emplegada seya l’asturianu o’l gallego-asturianu; certámenes musicales o lliterarios n’asturianu o gallego-asturianu; y proyectos musicales fechos en llingua asturiana o eonaviego dafechu», son los distintos tipos de proyectos venceyaos a la música que pueden ayudar a financiar les ayudes pa la normalización llingüística acordies a les bases. La convocatoria afita qu’hai dos llines: una pa empreses y profesionales dotada con 70.000 euros y otra p’asociaciones con una partida de 50.000. D’esta manera, la música n’asturianu pue acoyese nuevamente a unes ayudes, tres de que va unos años desapaecieran les subvenciones específiques pa la promoción de la música n’asturianu y gallego-asturianu.
Per otru llau, les bases de les ayudes pa proyectos culturales singulares a desenvolver, prioritariamente, nel ámbitu rural entienden «por actividaes artístiques y culturales, los espectáculos, esposiciones y actividaes comprendíes nos siguientes sectores: música, llírica, lliteratura, teatru, danza, artes plástiques, cine y audiovisuales, y videoxuegos, asina como los gastos derivaos de la execución y difusión d’estes actividaes». D’esta manera, eventos como la organización de festivales o espectáculos musicales podríen algamar financiación con esta convocatoria que destina 150.000 a proyectos d’entidaes ensin ánimu de llucru y 150.000 pa empreses y profesionales.
Aceleradores culturales
Amás, esta dirección xeneral venceyada a la Viceconseyería de Cultura, Política Llingïística y Deporte tamién ta acabante de convocar otres ayudes al cine y audiovisual, a la creación lliteraria y a proyectos d’aceleración cultural. Esta última convocatoria tien un presupuestu de 430.190 euros, ta financiada polos fondos europeos Next Generation y tán destinaes a la obtención d’habilidaes emprendedores y financieres de los y les profesionales de la cultura y la creación, a traviés d’acciones como: acelerar el crecimientu del texíu empresarial y profesional de les ICC; impulsu de la tresformación a la cultura dixital y la incorporación de les nueves tecnoloxíes nes ICC; favorecer les interconexones ente les ICC y d’estes con otros sectores económicos; y meyorar l’accesu a la financiación de les ICC.
.
Suscríbite a les nuestres novedaes
