Villamayor acueye esti branu la esposición sobre’l vigulín tradicional en Piloña

Tres l’éxitu de la primera edición, los próximos 23, 24 y 25 de setiembre van cellebrase en L’Infiestu les II Xornaes del Vigulín Tradicional n’Asturies. Pero enantes de qu’escomiencen, la organización calez l’ambiente amosando la esposición El Vigulín Tradicional nel Conceyu de Piloña. Del 22 de xunetu al 31 d’agostu, l’Ábside de Villamayor va acoyer esta esposición n’horariu de 16:30h a 20h. Amás, esti vienres 22 va inaugurase nesti emplazamientu con una presentación y entamu musical a manes d’África Domínguez y Rodrigo Joglar.

LaKadarma, l’Archivu de la Música Tradicional d’Ambás (ATOAM) y l’asociación Reflexu son los responsables d’esta amuesa de semeyes que yá s’estrenara’l pasáu añu en L’Infiestu mentantu les I Xornaes del Vigulín Tradicional n’Asturies. Con ella reivindiquen la tradición del vigulín nel conceyu de Piloña como una seña d’identidá cultural única dientro’l panorama de la música tradicional asturiana, destacando’l bultable númberu d’intérpretes d’esti instrumentu na música popular ente’l sieglu XIX y finales del XX.