Aurelio Argel (1963-2018) foi un periodista, críticu y dinamizador de la música asturiana. Durante 25 años dirixó’l programa de Radio Asturias Música para raptar princesas, amás de participar n’otra montonera medios nos que siempre puxó por esta escena. Dende 2019 la llocalidá onde nació, Soto Rei, celebra los Alcuentros de Música Tradicional na so alcordanza qu’esti fin de selmana lleguen a la so sesta edición.
La programación arranca’l vienres 5 a les 22h coles actuaciones de dos de les bandes más destacaes de la escena folk y rock del país, Corquiéu y La Tarrancha. La banda folk ribeseyana va presentar el so trabayu nuevu El Zanjón, amás de facer un percorríu per cuasi trés décades de carrera. Per otru llau, la formación mecigayu-ska actúa per tercer vegada nesti eventu pa llevar a La Ribera los sones ska, reggae, funk, balkan, punk-rock… que caractericen al so personal estilu.
Los sones tradicionales protagonicen la xornada del sábadu 6. A les 21.30h el Parque de Soto Rei acueye l’actuación de la Banda Gaitas Marino Tapiega y de la organizadora del eventu, la Banda Gaites Soto Rei. El festival zárrenlu el dúu formáu por aclamáu gaiteru escocés Ross Ainslie xunto a Steven Byrnes, guitarrista y bouzukista irlandés. D’esta manera, los Alcuentros de Música Tradicional n’Alcordanza d’Aurelio Argel siguen afondando n’esparder la música de raigañu dende’l conceyu de La Ribera, calteniendo’l llabor desendolcáu por Argel.
Suscríbite a les nuestres novedaes
