Vuelven les Nueches Celtes
Nestos meses nos que se tán poniendo fin a toles restricciones que traxo l’andanciu y dellos eventos tán volviendo a la normalidá, nun podía faltar el regresu d’unes folixes bien importantes pa la música asturiana: les Nueches Celtes. Les cites que yá tán confirmaes son el Sol Celta d’Avilés del 3 al 7 de mayu; la Nueche Celta d’El Puntal (Villaviciosa) el 9 y 10 de xunetu; el Festival Intercélticu d’Avilés del 24 al 31 de xunetu y la Folixa nel Paraísu de L’Infiestu del 12 al 14 d’agostu.
La novena edición del Sol Celta d’Avilés -que per primer vez va facese nel mes de mayu- va cellebrase na plaza Hermanos Orbón, entama’l martes 3 de mayu a les 17h y va durar hasta la nueche del sábadu 7. Tán programaos pasucais con bandines, actividaes pa la reciella, mercáu, amueses gastronómiques y lliteraries, nueche en baille y conciertos. Esti ye’l cartelu y la programación:
Los díes 9 y 10 de xunetu, l’área recrativa d’El Puntal, en Villaviciosa, acueye la Nueche Celta. Calea, José Manuel Tejedor y La Tarrancha toquen el sábadu 9, mentes que Les Pandereteres L’Algara y escolinos van facelo’l domingu 10 a la hora’l vermú. Esta ye la programación completa:
El Festival Intercélticu d’Avilés y Comarca llega a la so 25 edición el 24 de xunetu. Hasta’l 31 de xunetu va acoyer delles actividaes dientro de les que tán programaes les actuaciones de música asturiana de l’agrupación Esbardu y del cantador de tonada Cantu la Vara. Esta ye la programación completa:
Por último, ta anunciada tamién la primer edición de la Folixa nel Paraísu Celtic Fest, eventu nel que van tocar en L’Infiestu los díes 12, 13 y 14 d’agostu destacaos nomes de la música celta, ente los que s’alcuentren los asturianos Rubén Alba y Fontoria. La programación ye esta:
