Otru añu más -y yá van 13- la Oficina de Normalización Llingüística de Xixón y el Taller de Músicos de Xixón entamen una edición nueva Alcuentros de Músiques Asturianes. Nesta ocasión les seis actividaes gratuites programaes van durar del 28 de mayu al 13 de xunu y van desendolcase nel Centru de Cultura Antiguu Institutu -sacantes una nel Muséu Casa Natal de Xovellanos-. Los conciertos d’Anabel Santiago, Cubasturia Jazz y Picarós; una tarde en danza con Soi Panderetera y Rollu Folk; la presentación del llibru Diarios d’una panderetera; y un alderique al rodiu la muyer na música asturiana; dan forma al eventu.
Les xornaes entamen el miércoles 28 de mayu a les 19.30h nel patiu del CCAI con un conciertu d’Anabel Santiago xunto a la so banda habitual y cola collaboración especial de les pandereteres Compañeras. Al otru día, tien llugar l’alderique entituláu Miraes de muyer na música asturiana que se celebra nel patiu del CCAI a les 19h y nel qu’intervienen la cantadora d’asturianada Sandra Álvarez, la música de la escena tradicional y jazz Mapi Quintana y la profesora y panderetera Raquel Vega. Too ello con moderación de Claudia González, pianista, panderetera y redactora en Musicasturiana.com.
El miércoles 4 de xunu a les 19h el tríu folk Picarós va presentar el so primer trabayu Son d’Ermu nel Muséu Casa Natal de Xovellanos y el xueves 5 a les 19.30h nel CCAI ye la presentación del llibru Diarios d’Una Panderetera na qu’intervienen l’autora Leticia Baselgas, la editora Alicia Álvarez y el músicu y musicólogu Llorián García. Completen l’axenda el conciertu de Cubasturia Jazz -cuartetu qu’entemez la música tradicional d’Asturies col jazz cubanu- el miércoles 11 a les 19.30h nel CCAI y el vienres 13 a les 20h «una tarde en danza al mou Xixón» cola participación de Soi Panderetera -agrupación formada pol alumnáu de la EMT La Quintana- y del cuartetu Rollu Folk.
Na edición d’esti añu los Alcuentros de Músiques Asturianes busquen «incentivar intercambios y reflexones al rodiu de les distintes manifestaciones estilístiques de la música asturiana d’anguaño». D’esta manera amesten «voces bien consagraes de la escena con otres formaciones de más recién creación» y recueyen tamién «la reinterpretación de lo asturiano dende una mirada internacional«. Too ello entemeciento dellos formatos y espacios «p’amosar la pluralidá, bayura y bona salú de la música asturiana, na so diversidá«.
Suscríbite a les nuestres novedaes
