Del 27 al 29 de xunu el Parque Natural de Fuentes del Narcea, Degaña y Ibias acueye la ‘2ª Sestaferia Cultural nel Monte’ del Zarréu Fest. AMA Asturies, en collaboración con vecines y profesores de Zarréu (Degaña) y con financiación de la Conseyería de Cultura, Política Llingüística y Deporte, entama esti eventu nel que va haber baille tradicional, gaita, pandereta, meses redondes, exposiciones, DJs y los conciertos de música n’asturianu de Corquiéu, Herbamora, Algaire y Skama la Rede. Too ello con zona d’acampada y entrada llibre.
«Esta sestaferia cultural nun pretende ser un festival al usu. Ye un eventu comuñal qu’apuesta pola cultura como pegollu del pueblu. Una lluz que sirva p’allumar el futuru pa esta tierra precisada de proyeutos, emburrie social, curiáu per parte de les alministraciones ya impulsu nel ánimu de la población que faiga espoxigar la zona y a los sos habitantes. Ente toes vamos demostrar que les zones rurales en peligru de despoblamientu n’Asturies nun tán muertes y tienen futuru gracies al trabayu comuñal de la so xente», argumenta’l colectivu Asamblea Moza d’Asturies pa entamar esti eventu en Degaña.
A falta de presentar el programa completu, el Zarréu Fest yá anunció los conciertos, qu’entemecen música tradicional y rock coles actuaciones n’asturianu de Corquiéu, Herbamora, Algaire y Skama la Rede, amás del grupu punk Expropiazón y los gallegos A Tralha da Terra de Montes.
Los próximos díes va anunciase’l restu del programa, nel que la organización anuncia que va haber «meses redondes, baille tradicional, gaites y pandereteres, mercáu esposiciones…». Toles actividaes van ser de baldre y hai zona d’acampada gratuita durante un fin de selmana «enllenu d’identidá, patrimoniu y cultura asturiana».
Suscríbite a les nuestres novedaes
