Xune Elipe recueye’l premiu Máximo Fuertes Acevedo pol so ensayu sobre la historia de la música asturiana

El pasáu vienres 18 de xunu, la Conseyería de Cultura, Política Llingüística y Turismu fizo entrega de los premios lliterarios de 2020. Ente los premiaos, destaca una obra dedicada a la música asturiana, “Hai una llínia trazada”, un estudiu de Xune Elipe -cantante de Dixebra y responsable de Goxe Producciones- sobre la historia de la música asturiana que ganó’l XXVI Premiu Máximo Fuertes Acevedo d’Ensayu. Darréu reproducimos el discursu pronunciáu por Elipe al recibir el premiu:

«Hai una llinia trazada, títulu del ensayu ganador del XXVI Premiu Máximo Fuertes Acevedo, ye una obra que percuerre la historia de la música asturiana dende que los y les habitantes d’esta tierra vivíen en cueves hasta’l presente. Y ye que yá hai nicios de cierta actividá «musical» dende esos primeros momentos. Andando’l tiempu, el xeógrafu griegu Estrabón y l’historiador romanu Tito Livio dexáronnos constancia nos sos escritos de los vezos sonoro-musicales de los astures. Cola constitución del Reinu d’Asturies la música va ufiertar tamién un elementu de prestixamientu, como lo demuestra la obra titulada O Dei Verbum, conocida davezu como Himnu a Santiago, compuestu na corte de Pravia de la que yera rei Mauregato (sieglu VIII). Y ye que na identidá política asturiana la música tuvo bien d’importancia yá dende mui ceo na historia.

La nuestra identidá musical foi creándose adulces a lo llargo de los sieglos, nesti sen, el musicólogu Eduardo Martínez Torner afirmaba qu’Asturies ye’l territoriu que meyor conserva’l recuerdu de lo que foi la llírica primitiva peninsular y que, poro, sería mui probable qu’esi recuerdu llegare tamién a la música popular de los sieglos XII y XIII. Per otru llau, ye a partir del sieglu XV cuando s’afita la conciencia de que los asturianos y asturianes falaben una llingua diferente de los demás pueblos, siendo vistos como una comunidá humana diferenciada cultural y políticamente.

Estos dos factores, música popular asturiana y llingua asturiana, van desenvolvese dende entós de manera paralela. Nesti sen, son mui reveladores les teoríes del etnomusicólogu Aindrias Hirt según les que se da una influyencia íntima ente les melodíes y la musicalidá de la llingua, afirmando que l’esquema del ritmu de cada canción provién del esquema de cada llingua. Na so apreciación esta ye la clave pa determinar les particularidaes de les músiques nacionales. L’estilu musical pue alcontrase a fin de cuentes nos motivos rítmicos de cada idioma. Tradición y llingua son los elementos fundamentales que tuviemos en cuenta pa definir y circunscribir eso que llamamos música d’espresión asturiana. 

El mio enfotu con esta obra foi facer un repasu pelos momentos, movimientos y intérpretes más importantes al traviés de los sieglos, resaltando los datos y fechos que foron cruciales nel devenir de la nuestra música. Y ello dende un puntu de vista non colonial, considerando a la música asturiana como un ente vivu y autónomu, non supeditáu nin dependiente d’otros procesos. Una historia contada dende dientro de la propia música del país, con un enclín claramente pedagóxico-divulgativu y militante nacional, social y culturalmente.  Creo qu’una panorámica global y amplia del fechu musical asturianu ye la meyor ferramienta pa comprender y analizar qué representó y representa la nuestra música y sobre qué base se sofita’l so futuru.

Por último, quixere aprovechar la ocasión pa manifestar que los músicos, pero tamién los escritores, los profesores, los periodistes, los filólogos, los actores… yá tenemos fechu’l nuestru llabor de preparar a esti idioma pa les necesidaes creatives, artístiques y comunicatives d’una sociedá del sieglu XXI. Nós cumplimos, agora toca que los nuestros representantes políticos asuman la so responsabilidá histórica declarando, ensin mieu a los negacionistes llingüísticos y los discursos del odiu idiomáticu, la oficialidá de les llingües propies: l’asturianu y el gallego-asturianu. Un país pequeñu como Asturies nun pue permitise desdexar o, nel peor de los casos, perder elementos trescendentales del nuestru ser colectivu como la llingua o la música propies, qu’ayuden a la so cohesión interna, visibilícenla nel contestu internacional y ye de lo meyor que como comunidá humana podemos ufiertar al mundu».

Dexa un comentariu

X