Añu y picu dempués del so últimu conciertu, Silvia Quesada va volver a xubir a un escenariu. La cita ye esti vienres 18 de setiembre nel Auditoriu Teodoro Cuesta de Mieres a les 20h. El formatu escoyíu va ser íntimu, acompañada d’Alfredo González al pianu de cola y l’artista anunció amás nes sos redes sociales dos sorpreses: «vamos estrenar unes cuantes canciones nueves» y «quiciabes haiga dalguna collaboradora…». Polo que la cita ye una oportunidá pa ver de nuevo y lo nuevo d’esta cantante.
Silvia Quesada ye una de les voces más destacaes de la música asturiana. Nacida en Tinéu en 1986, entamó a cantar dende bien moza en formaciones folk como Los Gatos del Fornu, Blima, Muyeres y Tejedor. La so carrera en solitario principió en 2014 cola publicación de La Pena Abierta, un discu de canción d’autora que la consolidó como una de les meyores cantantes del país. Nel so últimu trabayu, Prefiero Ver Llover (2019), l’artista llevó a la música n’asturianu a esplorar nuevos caminos sonoros, faciendo un pop eléctricu y enllenu de color que llevó’l Premiu AMAS a Meyor Discu d’Otres Escenes.
Suscríbite a les nuestres novedaes
