El LABoral Centru d’Arte y Creación Industrial convoca, un añu más, les sos Residencies Artístiques pa creadores individuales o coleutivos asturianos o residentes n’Asturies. Yá ta abiertu’l plazu pa la selección de proyectos hasta’l vienres 17 de xineru a les 12h. Nesta edición van apoyase seis proyectos: cuatro pa los sos estudios -más enfotaos a les artes visuales- y dos pal LABoratorio de Sonido, un espaciu preparáu pa trabayos musicales y equipáu con dellos recursos técnicos. Les residencies escoyíes van deseldolcase ente’l 4 de febreru y el 31 de xunetu de 2025 per un tiempu mínimu d’un mes y máximu de seis.
Como despliquen les bases de la CRA, el LABoratorio de Sonido ye un «espaciu pa la esperimentación y producción d’obres al traviés de residencies d’artistes sonoros y músicos mesmo emerxentes qu’afitaos». Espérase d’estos proyectos que les persones seleicionaes desarrollen pieces rellacionaes coles práctiques sonores y musicales de la creación contemporánea. Amás, la iniciativa pon a disposición otros recursos como’l fabLAB -un llaboratoriu de creación dixital- y la biblioteca especializada del centru.
Otres convocatories abiertes
Amás d’esta convocatoria específica del LABoral Centru d’Arte y Creación Industrial, l’espaciu ta asociáu a otres dos iniciatives asemeyaes. Per un llau, les Ayudes a la creación, investigación y producción de proyectos artísticos en residencia TABACALERA, un programa del Ministeriu de Cultura pal que yá ta abierta la convocatoria hasta’l 28 de xineru y que quier financiar proyectos nel campu de les artes visuales y la creación contemporánea, amás de fomentar la movilidá d’investigadores y creadores. Per otru, La Llaboral entama tamién una collaboración col centru iMAL de Bruseles, una residencia d’investigación artística d’un mes pa la que’l formulariu ta abiertu hasta’l 19 de febreru.
Suscríbite a les nuestres novedaes
