Yá ta en toles plataformes musicales “La Punta’l Boquerón”, l’adelantu del discu de La Bonturné
Dempués de muncho tiempu d’espera, yá pue sentise en toles plataformes dixitales un cantar d’estudiu de La Bonturné, el grupu formáu por Merce Santos (zanfona), David Varela (acordión y percusión), Santi Caleya (saxu sopranu y gaita) y David Casillas (Contrabaxu). “La Punta’l Boquerón” ye’l nome del adelantu d’A Contraforga, primer trabayu d’esti cuartetu que va asoleyar esta primavera.
«Ye un tema melódicu; un schottish, claru exemplu na nuestra sonoridá tímbrica, con una melodía compuesta por Merce Santos», comenta David Varela sobre “La Punta’l Boquerón”. Grabáu y mezcláu nos Tutu Estudios por Sergio Rodríguez, la pieza va amosar el bon facer d’esta formación que lleva cerca de tres décades compartiendo llabor n’otres agrupaciones como La Viga Travesá, La Bandina les 47, Folkgando, Pauline en la Playa o La Bandina.
