Slum Suit publica’l discu en vivo ‘Directu L.lenizu’
Yá ta en toles plataformes dixitales Directu L.lenizu, l’EP del grupu de jazz de raigañu Slum Suit que recueye’l conciertu que dieron el 11 d’avientu nel Teatru Vital Aza de L.lena. Esti trabayu ta formáu por cuatro temes -ún d’ellos inéditu- y recueye parte de lo que foi’l so espectáculu Siguiendo’l Camín d’Iturralde.
«¿Sabes esa sensación de vacío de cuando acabes un llibru, un videoxuegu o una serie? pues sentía eso cuando s’averaba’l final del homenaxe a Iturralde. La ultima parada d’esta xira foi en Ḷḷena y, pa zarrar esi proyectu nel que tan bien lo pasamos, falamos con Álvaro Perez y el solu convirtió’l Teatru Vital Aza nel nuestru estudiu de grabación», comenta Carlos Casado, cabezaleru de Slum Suit sobre’l por qué d’esti discu. «Álvaro encargóse tamién de la mezcla de los temes y empapóse muncho de la idea Slum Suit, algamando un soníu que nos prestó abondo», añade. Amás, el saxofonista y gaiteru destaca que sienten «debilidá polos discos en directo» y que’l Directu L.lenizu inspírase na portada nel vinilu Getz/Gilberto Vol. 2 de 1964, ún de los trabayos preferíos de la formación.
Con Directu L.lenizu Slum Suit amplía una discografía qu’entamó en 2017 cuando la formación tovía taba asentada en Nueva York. L’EP homónimu Slum Suit abrió un camín que siguieron Ida y Vuelta (2019), La Casa Vieya (2022) y que sigue agora con esti primer EP en directo y en formatu dixital.
