Yá tán disponibles na web y en plataformes los tres discos de Celia González

Dende que’l proyectu musicasturiana.com abrió la tienda online con 150 referencies a finales de payares de 2017, vien incorporando pasín a pasu nuevos CDs, llibro-discos y vinilos al so catálogu. Dende esta selmana yá tán disponibles en plataformes dixitales y na tienda online los tres trabayos de Celia González Coloradina la Guinda (2004), Cantoras ya bordones (2008) y Sous le vert pommier (2013) -col trío astur-bretón Trovando-, editaos pol sellu Fono Astur.

Coloradina la Guinda (2004) ye’l nome del primer discu de cantares y sones con gaita de rabil de Celia González. Acompáñenla les voces y panderetes de Mónica Menéndez, Lucía Carrizo y Mabel Reig, el rabel de Jorge Mochales, Emilio Martínez a la gaita, el dulcimer d’Hervé Perochon, la curdión de Xuan Nel Expósito y les percusiones de Constantino Menéndez y Pedro Pangua. La mayor parte de los temes son igües de la propia Celia González y de Lisardo Lombardía a partir de cantares de la tradición asturiana, anque’l discu tamién inclúi tres composiciones del zanfoneru italianu Maurizio Martinotti.

En 2008, Celia González asoleya Cantoras ya bordones, un discu que continúa’l proyeutu entamáu con Coloradina la Guinda y que fai un percorríu pelos cantares y bailles del territoriu asturianu. El grupu ta formáu poles cantores Natalia González y Silvia Quesada -que toca tamién la flauta-, Hervé Perochon al dulcimer, el gaiteru Emilio Martínez, la curdión diatónica de Marcos García y la xipla y percusiones de Diego Casado. Nesti trabayu, la música tradicional asturiana convive cola bretona, la gallega y la llionesa.

Trovando foi’l proyeutu astur-bretón de Celia González xunto a Leticia González Menéndez -anguaño conocía como Leti Baselgas- y Hervé Perochon, que resultó nel discu Sous le vert pommier (2013), una mestura de repertoriu tradicional bretón, francés y delles dances y agarraos asturianos como la «Danza de la xarra» y «Aquella palombina», un cantar grabáu pol coleutivu Muyeres -al que pertenecieron dambes músiques asturianes- años enantes.