El gaiteru, saxofonista y flautista Fabián Fernández (Llanera, 1993) foi seleccionáu pa participar nel proyectu 7 Sóis Revolution Orkestra dientro del festival Sete Sóis Sete Luas, con sede en Portugal, entamáu pola asociación del mesmu nome. D’esta manera, la música asturiana algama representación nesti espaciu que conmemora’l 50 aniversariu de la Revolución de los Claveles con un repertoriu qu’amiesta canción protesta y reivindicativa con músiques de raigañu d’Asturies, Cabo Verde, Portugal, Italia, Mozambique y otros llugares. Xunto a Fabián Fernández y baxo la direición del guitarrista portugués Manuel de Oliveira, toquen na formación el baxista Rui Salomão de Cabo Verde, el tocador de gumbri Khalid Amerhouch de Marruecos, el percusionista portugués Ruca Rebordão y la cantante romana Barbara Eramo.
7 Sóis Revolution entamó’l fin de selmana pasáu con una residencia artística de seis xornaes y ocho hores al día d’ensayu, empobinada a la preparación d’una xira de 11 conciertos en diferentes ciudaes europees. El repertoriu asturianu seleccionáu ye’l míticu cantar mineru «Santa Bárbara bendita» y dos temes tradicionales: «Danza de la Molinera» y «Muñeira Perl.lunes«. Col envís de da-y una color diferente al setlist, los músicos faen una mezcla d’instrumentos de cada país d’orixe con sones estremaos, entemeciendo, por exemplu, la música asturiana con ritmos africanos o melodíes luses tocaes cola gaita.
El músicu profesional destaca lo interesante que ta siendo trabayar nun proyectu d’estes característiques y conocer la cultura de los sos compañeros: «Son xente que vien d’otres músiques qu’anque son de raigañu son bien estremaes a la nuestra porque la tendencia ye muncho más a la música africana, sobre too en ritmos y melodíes. Nun dexen de tener esi aspectu de la tradición oral, con temes sencillinos de melodía que recuerden muncho a lo que tenemos en casa». Fernández sorraya, amás, el cambéu de mirada que supón participar nun proyectu d’estes característiques: «Ye mui interesante qu’un gaiteru seya capaz d’axuntase con otros instrumentistes que nun tienen nada que ver col Arcu Atlánticu nin casi oyeron falar d’ello. Ye otra perspectiva que munches veces tenemos n’Asturies olvidada, que miramos p’arriba y cuéstanos más mirar pa baxo y tenemos munches coses en común colo portugués, cola música de migración».
Delles reflexones y propuestes
«Nun vienen a buscanos, tenemos que salir nós fuera. Refiérome a los instrumentistes, que munches veces quexámonos porque nun sale nada. Oye, hai que tar un poco más al loro pa que surdan oportunidaes», camienta Fabián Fernández animando a que más intérpretes asturianos entren nel circuitu de les músiques de raigañu y s’interesen por feries y eventos como’l WOMEX. Reflexona tamién al rodiu del arriquecimientu d’esti tipu d’intercambios n’otres direiciones: «en vez de quedase solo en casa o lo que yá conocemos -Bretaña, Irlanda, Escocia, Francia, País Vasco, Galicia, Asturias-, hai proyectos que t’ayuden como músicu a alcontrar otros espacios. Valte a ti pa formate más, crear nueves sinerxes, conocer nuevos repertorios, nueves idees, y dar a conocer les nuestres, que son tan válides como les demás». A la fin, como bien diz el multiinstrumentista, ye «poner la música asturiana nuna posición equivalente».
Na semeya, los músicos de 7 Sóis Revolution Orkestra.
Suscríbite a les nuestres novedaes
