Del 28 d’agostu al 8 de setiembre ventidós barrios xixoneses van enllenase de cultura asturiana gracies Cultura Peatonal, ciclu entamáu pola Fundación Municipal d’Educación, Cultura y Universidá Popular del Ayuntamientu de Xixón. Bandes de gaites, agrupaciones folclóriques y canción asturiana dan forma a una programación con cuasique 60 actuaciones, desendolcada en parques y places. La programación completa pue consultase entera nesti folletu.
«Xixón ye una villa con xente d’enfotos variaos enforma. Averar a toos ellos la cultura asturiana ye l’oxetivu cimeru d’esti programa d’actividaes venceyaes colos nuestros raigaños», comenten dende l’área de Cultura y Educación del Conceyu. Asina ye como Cultura Peotonal apuesta poles agrupaciones y artistes de Xixón y pa ello va cuntar coles actuaciones de les bandes de gaites Noega, Villa de Jovellanos, Pepe Blanco, Villa de Xixón, Garulla, Magüeta, Seronda y Conceyu de Xixón; de los grupos de baille Coros y Danzas Jovellanos, Trebeyu, El Xolgoriu, Real Grupo de Cultura Covadonga, Los Xustos, El Turruxón y Excelsior; y de l’Asociación d’Intérpretes de Canción Asturiana. Tamién va haber espaciu pa los xuegos y deportes tradicionales gracies a l’Asociación Cultural Esbilla.
Toles actuaciones van ser a les 12.30h y a les 20h y son gratuites. Cimavilla, Montiana, Ciares-El Llano, La Calzada, Santa Bárbara, Pumarín, La Camocha, Tremañes, Nuevu Xixón, Begoña, Roces, El Natahoyo, El Centru, Laviada, Pescadores, Xove, Portuarios, Montevil, Nuevu Roces, Serín y El Muselín son los distintes barrios y parroquies que van acoyer los escenarios de Cultura Peatonal.
(Na semeya, actuación del Grupu Folklóricu Trebeyu)
Suscríbite a les nuestres novedaes
