Música tradicional asturiana y televisión
La primer vez que se vieron emisiones de televisión n’Asturies foi nel añu 1957, sicasí, éstes yeren señales que llegaben de fuera de la Península (ente elles de la BBC). A partir de 1958 produciéronse recepciones de señales esporádiques provinientes de la televisión estatal española, anque hai qu’establecer 1959 como l’añu nel que se constata la primer recepción documentada de TVE nel nuestru país. La fecha oficial na que llega la televisión a Asturies coincide cola inauguración del Centru Emisor del Gamoniteiru en 1964, gracies al que se produz la so implantación en prácticamente tol territoriu; esti procesu hasta llegar a tolos asturianos y asturianes foi mui lentu y enllenu de torgues, en bona midida poles condiciones orográfiques especiales del terrén nel que teníen qu’asitiar los repetidores y la singularidá del nuestru paisaxe qu’impidía una bona sintonización de la señal. Otra manera, nel añu 1971 abría la so sede n’Uviéu TVE, poniendo en marcha en 1988 el Centru Territorial, asitiáu en San Esteban de les Cruces, siendo ún de los más grandes de tol Estáu y, nun principiu, pensáu pa ser un gran núcleu de producción.
La rellación de la televisión cola música tradicional asturiana producíase naquellos primeros momentos de ralo en ralo, cola participación en dellos programes de los típicos grupos de coros y dances de la Sección Femenina, o con actuaciones d’instrumentistes o cantantes que facíen parte d’ellos. Esi foi’l casu del gaiteru Remis Ovalle, quien mui tempranamente, nuna de les primeres emisiones de TVE, nel añu 1956, apaecía interpretando delles pieces.
Tamién en programes como Salto a la fama (1961-1965), concursu con una sección dedicada a los «bailes regionales», intervinieron delles agrupaciones asturianes; asina como nel espaciu competitivu Danzas de España (1966) dedicáu específicamente a esti tipu de grupos folclóricos. Nes siguientes décades la presencia de la música tradicional asturiana pudo vese en programes como Raíces (1972-1983) -con capítulos centraos na fiesta de los Güevos Pintos, na gaita o na xota- o Gente Joven (1975-1983).
La creación del Centru Territorial de TVE n’Asturies (financiáu en bona parte pol Gobiernu Asturianu), al empar que la creación de la Productora de Programes del Principáu d’Asturies (PRODA), de titularidá autonómica y encargada de producir materiales que RTVE emitiría p’Asturies (como’l tituláu La gaita, el sonido de Asturias), traxo consigo un interés mayor pola nuestra tradición musical y folclórica.
Nel añu 1989 los responsables de TVE n’Asturies encárguen-y al periodista Carlos Jeannot la realización d’una serie de programes col títulu de Canción Asturiana, de periodicidá selmanal y con una duración d’unos quince minutos, con esti motivu percuerre la xeografía del país grabando cantares y bailles. Per él pasaríen una montonera d’intérpretes de tonada, instrumentistes (gaita, tambor, pandereta) o agrupaciones corales, constituyendo un documentu perimportante pa conocer l’estáu de la música tradicional asturiana d’aquella dómina. D’esti espaciu llegaron a emitise 98 capítulos -l’últimu en 1991-, dalgo sorprendente daquella nun formatu dedicáu a la música tradicional. Los episodios d’esti programa nun tán disponibles de manera pública, anque una copia de caún d’ellos guárdase nel Archivu «Carlos Jeannot», inauguráu en Suarías (El Valle Bah.u de Peñamellera) nel añu 2010. Como muestra d’ello, ufiertamos una de les entregues de Canción Asturiana, na que pue vese y sentise a José Remis Ovalle (apaez la so gaita histórica y otros materiales), al Grupu de Gaites Gueñu y a La Pastorina (nuna de les sos facetes menos conocida como cantadora de tonada); l’estilu y estética del programa ye sobriu y seriu, como correspuende a los medios técnicos daquella y al calter que se-y quería dar.
Cola creación del ente públicu de comunicación autonómicu nel añu 2004, Radio Televisión del Principáu d’Asturies (RTPA), na que posteriormente va integrase la PRODA, la tradición musical asturiana diba a volver a tener cierta presencia mediática. Ello ye que, nel añu 2006, estrenábase la serie documental Camín de cantares, ellaborada sobre los materiales, datos y contactos del Archivu de la Tradición Oral d’Ambás (ATOAM). Presentáu por Xosé Antón Fernández (Ambás), percorrió prácticamente tola xeografía asturiana a lo llargo de seis temporaes y 78 capítulos. Esti programa, que llegó a tener datos d’audiencia bultables, convirtióse nuna verdadera enciclopedia audiovisual de la tradición musical y oral asturiana, entrevistando a cientos d’informantes que dieron cuenta de la salú y variedá de la mesma; el llabor entamáu con esti espaciu tendría secueles como Camín o Siguir en camín. Otros espacios dedicaos a la música tradicional del país foron Sones y Cantadera, nos que’l responsable últimu yera Ismael González Arias, que recoyía y actualizaba l’espíritu del históricu Canción Asturiana, pero agora dende un plató. Anguaño, la televisión pública asturiana tien n’emisión un espaciu llamáu Axuntábense, presentáu por Anabel Santiago y Pau Santirso, que quier ser más un espectáculu (dicho esto ensin nengún componente peyorativu) estrictamente televisivu qu’una muestra de calter etnomusicolóxicu. El so enfotu ye llevar la música asturiana, tanto la tradicional como les sos nueves espresiones, a un públicu mayoritariu avezáu a otru tipu de formatos audiovisuales.
Foi esti un repasu pequeñu a la presencia de la tradición musical del país na televisión, con formatos bien distintos ente sí, pero que foron dando cuenta al traviés de los años de la singularidá, pervivencia y variedá d’esti patrimoniu de gran valir y guapura.
Xune Elipe. Responsable de Discos L’Aguañaz / Goxe Producciones.
