David Varela nun apara. Amás de la preparación de la promoción y de la xira d’A Contraforga -el primer trabayu de La Bonturné que sal la selmana que vien y que yá se pue acutar en preventa-, el multiinstrumentista xixonés ta faciendo delles actividaes de divulgación de los instrumentos tradicionales del país: unes pal Ministeriu d’Educación, otra pa Reciella y otra pal Aula Didáutica de Cultura Popular Asturiana d’Avilés.
Esti llunes 24 partició nel programa Rutas Científicas, Artísticas y Literarias del Ministeriu d’Educación. Nél, desplicó a un alumnáu de 1º y 2º de la ESO, mayoritariamente granaínos y caceñeros, delles cuestiones rellacionaes cola música tradicional asturiana. «Tuvo mui prestoso porque díxi-yos que teníen que permitime la llicencia de que se m’escapé daqué n’asturianu, porque pa mí facelo en castellanu ye un esfuerzu, y resulta que los cacereños entendíen l’asturianu perfectamente porque veníen de pueblu y acabaron tocando conmigo’l tambor como dios», comenta Varela. «Tomáronlo con muncho interés y había hasta ún que tocaba’l calderu, l’asa del calderu, y deprendiólo en casa en cuenta de nuna escuela de música tradicional». El 1 de mayu tien la próxima sesión d’esti programa educativu estatal.
Per otru llau, esti xueves 27 fai’l segundu alcuentru musical con Reciella, l’asociación de Families pol Asturianu. «Vamos facer percusión con Cotidiáfonos, que ye como yo llamo a los preseos de cocina a los que-yos damos usu musical, en cualesquier sobremesa familiar cantarina. Deprenderemos a facer ritmu cola payel.la, cola llata pimentón, col vanu, morteru, botella, cuyares, vasos, platos», desplica’l músicu nes sos redes sociales.
Xira La Bonturné
Pa rematar, esti sábadu 29 a les 12h participa nun vermú cultural del Aula Didáutica de Cultura Popular Asturiana en Llaranes, Avilés. Los instrumentos musicales d’Asturies ye’l títulu de l’actividá na que’l multiinstrumentista va siguir col so llabor d’espardimientu de los nuestros raigaños sonoros. Dempués d’esto arranca otra selmana intensa pa él y los sos compañeros de La Bonturné: el 3 de mayu toquen nel Teatru Xovellanos de Xixón -dientro del ciclu Encaja2-; el 4 de mayu asoleyen A Contraforga y el 6 de mayu actúen nel Conciertu de les Lletres de Llanera.
Suscríbite a les nuestres novedaes
