Esti sábadu 29 d’abril el barriu carbayón de Fitoria acueye la dieciocho edición de la so tradicional espicha. La música y la folixa van protagonizar esti eventu que va tener pela tarde les actuaciones de la Banda Gaites Llariegu y la bandina Los Gascones; mientres que pela nueche xuben al escenariu Loína, Llevólu’l Sumiciu y los salmantinos Mayalde.
A les 13h va abrise la carpa asitiada en Villamaxil y a les dos de la tarde entama la espicha. Amás de les actuaciones de la Banda Gaites Llariegu de Sariegu y de la bandina popular Los Gascones, va tar el micru abiertu pa quien quiera echar unes pieces enriba l’escenariu, A les 20.30h arranca la Nueche Folk colos conciertos del tríu de folk de cámara Loína, la banda de música tradicional salmantina Mayalde a les 22h y la electrónica de raigañu de Llevólu’l Sumiciu a la medianueche.
L’eventu entámalu’l Grupu de Baille Tradicional Fitoria y tien dellos precios: la entrada pa xente adulto pa toles actividaes gastronómiques y llúdiques ye de 13 € hasta’l 27 d’abril y de 17 € na puerta; y pa reciella d’ente 5 y 12 años ye de 9 € anticipada y de 13 € na puerta. Pa la xente que namás quiera dir a la Nueche Folk el preciu únicu ye de 5 euros.
Suscríbite a les nuestres novedaes
