El pasáu febreru musicasturiana.com entamó’l Semando Fest, el primer festival de música moza n’asturianu. L’eventu foi un éxitu, con toles entraes escosaes, y nella participaron Alicia Villanueva y Luis Álvarez Pola, dos de los nomes que protagonicen el relevu xeneracional na tonada asturiana; Loína, tríu acústicu de folk atlánticu; Algaire, banda de música tradicional fusionada; y Llevólu’l Sumiciu, dúu qu’amesta música electrónica y asturiana. Agora esta iniciativa da un pasu más cola grabación y publicación de Semando Son, un discu compilatoriu nel que van participar estos cuatro artistes con tres cantares inéditos caún.
L’álbum va grabase a finales de xunetu nos Tutu Estudios de Corvera baxo la producción de Sergio Rodríguez y destaca porque va ser el primer compilatoriu de música moza n’asturianu, amás con temes nuevos de cada formación. Tamién va ser la primer vez qu’Alicia Villanueva, Luis Álvarez Pola y Loína pasen pel estudiu de grabación. El discu va asoleyar a lo llargo de la seronda d’esti añu tanto en formatu CD como en toles plataformes musicales.
Nel Semando Son, compilatoriu de música moza n’asturianu axúntense distintos estilos pa reflexar la diversidá estilística de los sones del país. La característica en común ye que tolos componentes de los grupos tienen menos de 34 años. D’esta manera, la iniciativa trata de puxar pol relevu xeneracional na música asturiana y promocionar los nomes nuevos d’esta escena.
Suscríbite a les nuestres novedaes
