Ayeri arrancó una nueva edición del Festival Internacional do Mundo Celta de Ortigueira, l’eventu más importante del xéneru na Península Ibérica. Esti añu va haber una bona representación d’Asturies gracies a los conciertos d’Alienda, Guieldu, Algaire, Felpeyu y a les actuaciones de la Banda Gaites La Laguna del Torollu, la bandina La Garrapiella y del grupu de baille tradicional Trebeyu.
Los grupos asturianos van entamar esta nueche a xubir a los escenarios. Los primeros van ser Alienda y Guieldu, que son finalistes nel Concurso Runas pa grupos noveles que dende hai 23 años entama esti festival gallego. Quien gane, va volver a actuar l’añu que vien nel eventu. Per otru llau, el martes 11 a les 23.15h ye’l turnu d’Algaire y el xueves 13 actúen pela cai la Banda Gaites La Laguna del Torollu y a les dos de la nueche Felpeyu.
El día 14 súmense al festival la bandina La Garrapiella y el grupu de baille tradicional Trebeyu, que van actuar peles cais d’esta villa coruñesa xunto a La Laguna del Torollu. Les tres formaciones repiten el vienres 15, sumándose amás un taller de baille asturianu. Una bona representación de la música’l país dientro d’esti festival que se celebra dende hai 45 años n’Ortigueira y que peles sos últimes ediciones pasaron más de 100.000 persones.
Suscríbite a les nuestres novedaes
