Del 10 al 18 d’agostu la llocalidá bretona de Lorient va acoyer la 53 edición del Festival Interceltique Lorient, l’eventu más destacáu del mundu celta. Esti añu la edición ta dedicada a la mocedá nos países celtes y la organización ta acabante d’anunciar los primeros nomes asturianos. L’axitador folclóricu Rodrigo Cuevas va tocar el domingu 11 nel escenariu Le Théâtre y ye tamién nesi escenariu onde Silvia Quesada va poner voz y pandereta al espectáculu Celtic Odyssée #3.
Esti anunciu forma parte del total de ventiocho bandes que yá desveló’l festival. Na programación apuesten por intérpretes musicales más mozos, en llinia col conteníu d’esta edición. Precisamente el cartelu ilustra la imaxe de lo que la organización presenta como «un personaxe andróxinu, que bien podría ser galés, asturianu, bretón, escocés… tener 16 años, 20 años, 27 años… ¡Representa a tola mocedá celta! Nun encuadre baxu, allumáu, tresmite la renovación, el dinamismu, el poder de la cultura celta». Les entraes yá tán a la venta y próximamente va haber más confirmaciones.
Suscríbite a les nuestres novedaes
