Del 3 al 7 de payares celébrase’l Festival Internacional de Videoclips de Oviedo (FIVO), certame dedicáu a la rellación ente música y realización audiovisual. Como tolos años, l’eventu premia a los meyores videoclips asturianos dientro de la Sección Asturias y, ente les 14 nominaciones, hai cuatro propuestes n’asturianu: Algaire, Ferla Megía, Compañeras y 6 Riales. Tamién son finalistes Rodrigo Cuevas, Mala Reputación y Nacho Vegas, artistes que canten davezu nesta llingua anque les pieces escoyíes pal FIVO nun tán interpretaes nesti idioma.
El sábadu 7 de payares a les 18.30h los Cines Embajadores Foncalada van acoyer la gala na que van proyectase los videoclips asturianos finalistes y concedese’l Premiu RTPA Sección Asturies, que ta gallardonáu con 500 euros y un diploma. ‘Villancico 2025’ d’Algaire y realización de Rubén G. Revilla de Báltico; ‘tiempu!’ de Ferla Megía y realización d’Antonio Llaneza; ‘La neña Aida’ de 6 Riales y realización d’Iván Jambrina López; y ‘Ochobre de 1934’ de Compañeras y con realización d’Alejandro Viña de 312 Films son les obres n’asturianu nominaes.
A elles xúntense ‘Un Mundo Feliz’ de Rodrigo Cuevas y realización de Jorge Rojas, ‘Los Asombros’ de Nacho Vegas y realización de Sofía Castañón y ‘El Hilo’ de Mala Reputación y realización d’Ignacio Cadenaba González; xunto a otres siete nominaciones que reflexen diversos xéneros y temátiques. La obra que resulte ganadora’l 7 de payares tamién va poder emitise na televisión y nes plataformes dixitales de la radiotelevisión pública, acordies coles condiciones recoyíes nes bases na web oficial del festival.
Suscríbite a les nuestres novedaes
