Esta tarde entama’l calendariu de conciertos de música n’asturianu pa esti 2024. Fernando Valle Roso y Silvia Moreno col so espectáculu Cantares de… y pa nen@s actúen a les 18h nel Auditoriu Teodoro Cuesta de Mieres inaugurando asina una temporada de conciertos que yá tien más de diez feches confirmaes. Los Berrones, Diañu Blues, los y les escolinos d’Anabel Santiago, Los Llerones, el II Semando Fest, L-R, Skontra, y el Rodrigo Cuevas son los eventos yá programaos ente xineru y marzu.
A falta de la que se conoza la programación del circuitu Asturies Cultura en Rede pa esti semestre, yá hai delles iniciatives privaes que tán anunciando conciertos de música’l país. La Taberna Narciso de Teberga va acoyer esti domingu 7 un eventu de Cantares de chigre a la una’l mediudía; el domingu 14 un recital col alumnáu d’Anabel Santiago tamién a la hora’l vermú y el sábadu 27 a les 23h l’actuación de la bandina Los Llerones.
Tamién va sonar en Xixón el rock n’asturianu nesti entamu de 2024. Los Berrones toquen el vienres 12 na Sala Albéniz; Diañu Blues el sábadu 13 nel Páramo Bar de Xixón; y Skontra el 24 de febreru na sala Tizón. D’otra banda, el fin de selmana del 9 y el 10 de febreru hai doble cita cola música’l país: Lata de Zinc acueye’l 9 de febreru el II Semando Fest colos conciertos de Sandra Álvarez y Noemí González, Mostru l’Horru, Guieldu y Ochobre; mientres que L-R van presentar el sábadu 10 el so tercer discu, V.O.S., na Sala Acapulco de Xixón.
Triplete de Rodrigo Cuevas
Pa zarrar estes primeres feches confirmaes tán los tres conciertos que l’axitador folclóricu Rodrigo Cuevas va dar ente’l 7 y el 10 de marzu nel Centru Niemeyer d’Avilés. Los recitales pa cada día escosaron les entraes en namás 15 minutos, amosando l’interés qu’existe por consumir música’l país cuando’l públicu la conoz.
Suscríbite a les nuestres novedaes
