A finales del 2022, el grupu de mecigayu-ska La Tarrancha daba nel Teatru Vital Aza de L.lena el conciertu Camín de Venti. Foi un espectáculu especial porque nel 2023 diben cumplir 20 años enriba los escenarios y entamar una xira de 20 conciertos entitulada VENTI. L’actuación foi el calentamientu de too esto y una celebración onde axuntaron a miembros vieyos de la banda y dellos de los sos collaboradores habituales. Agora, ve la lluz nun discu en directu en formatu dixital.
El repertoriu del discu Camín de Venti esbilla bona parte de los cantares interpretaos nel conciertu de L.lena y fai un repasu a los venti años de la banda, incluyéndose temes que La Tarrancha llevaba bien de tiempu ensin tocar. L’álbum nun va asoleyar en formatu físicu y, en palabres del grupu, «ye una forma de tener constancia d’esi alcuentru cargáu de sentimientos y emociones ente amigos y amigues, musicos y públicu»»
El directu quedó rexistráu polos técnicos de La Tarrancha, Ruboh y Zeros Gutierrez, y ta entemecíu y masterizáu por Zeros en ZLAudio. A la cita nun pudieron dir tolos collaboradores invitaos, pero sí que pudieron participar de Nano a la guitarra; Simón San José a la batería; Paco Caleru al baxu; Dani Álvarez a les flautes, buzuki y gaita; Nel de Purnea a la guitarra acústica; y gaiteros gaiteres y percusionistes de la Banda Gaites Villaviciosa.
Suscríbite a les nuestres novedaes
