Esti sábadu 17 a les 21.30h, Felpeyu actúen na Taberna Cuévano de La Pola Siero, ún de los chigres más destacaos pa los siguidores de la escena folk. El conciertu va ser especial porque la veterana banda estrena formación nueva. «Ye’l primer conciertu completu de Bree Delian al curdión. Con Bree volvemos a tener un instrumentu indispensable nel soníu de Felpeyu y de la tradición musical asturiana», desplica Ruma Barbero, fundador, lletrista y percusionista de la banda.
«Bree ye australiana, de Nimbin, Nueva Gales del Sur. Conocímosla na xira australiana del añu 2000 y foi la nuestra manager nes xires de 2001 y 2003. Anguaño vive n’Asturies y pasa a integrase na banda, siendo la segunda muyer en tocar en Felpeyu tres d’un par de sustituciones d’Andrea Joglar (gaita y flauta), y la primera dafechu na formación». Con esta incorporación medra’l númberu de muyeres presentes na música asturiana de raigañu y Felpeyu recupera una parte fundamental del so soníu.
Felpeyu ye ún de los grupos más importantes del folk asturianu. Formaos en 1991 en Salamanca polos estudiantes universitarios xixoneses Ígor Medio y Ruma Barbero, lleven tr4s décades reellaborando la música tradicional asturiana al traviés d’un folk acústicu influenciáu poles corrientes de la música celta atlántica y europea. Cinco discos d’estudiu y ún en directo; conciertos en 14 países y cuatro continentes; y tol reconocimientu y el cariñu del públicu asturianu, faen d’esta banda un grupu imprescindible.
Suscríbite a les nuestres novedaes
