La Guinda ye un proyectu musical fundáu en Francia pola avilesina Ana Pereda (Filanda). El so estilu musical caracterízase por entemecer ritmos del mundu -llatinos, balcánicos, africanos, mediterráneos…- dientro de los que la música asturiana tien un espaciu destacáu. Tres dellos años de conciertos y d’asoleyar singles y un primer EP, el grupu quier entrar a grabar el so primer trabayu de llarga duración. Pa ello entamen una campaña de micromecenalgu pa la que necesiten algamar 4.400 euros.
«Queremos facelo bien y ufrir un discu que se paeza a nós, nel que vamos poner tol nuestru corazón. Esti álbum sería la culminación d’años de trabayu y pasión, y queremos tar arguyoses d’él», desplica la formación nel testu de presentación del crowdfunding, añadiendo que «cada etapa del procesu implica un gastu, y cuando toos esos gastos s’acumulen, el proyectu vuélvese mui costosu en poco tiempu». Por eso sorrayen que «los cantares yá tán llistos, los instrumentos tán afinaos y namás faltes tú pa que la nuestra música siga viaxando, xuntos».
Nesti discu quieren rexistrar toos esos cantares que los lleven acompañando na carretera, conciertos y llocales d’ensayu tou esti tiempu. Pa ello va quieren cuntar col productor Michel Assier-Andrieu, al que conocieron nuna residencia creativa: «al descubrir el nuestru universu, propúnxonos de secute grabar nel so estudiu, en condiciones profesionales, con tol sofitu qu’eso implica».
El 13 d’avientu ye l’últimu día pa sofitar esti micromecenalgu con aportaciones que van dende los 10 € hasta los 1.000 € y, a cambiu, recibir delles recompenses. «Ensayos, grabación, mezcla, masterización, prensao, diseñu gráficu, distribución…», son dalgunos de los costos a los que tien que facer frente la formación y pa los que necesita’l gabitu del so públicu: «con un simple xestu d’apoyu podéis facer realidá esti suañu llocu. Facer una donación, falar d’ello, compartir el proyectu… cada xestu cunta y marcará la diferencia».
Identidá asturiana y internacional
«Durante diez años, viví lloñe de mio tierra y de la mio xente. Lloñe d’Asturies. Dempués de vivir per dellos países, volví a casa con una mochila enllena de melodíes y emociones, y una entruga que nun dexaba de pasame pela tiesta: ¿En quién te conviertes cuando cambies d’idioma? Los mios cantares son una búsqueda constante d’identidá«. Con estes pallabres Ana Pereda, cabezalera de La Guida, desplica dalgunes de les razones que-y ficieron entamar esti proyectu.
Agora, cola so voz, el so charangu y l’acordión; con influencies de la música llatinoamericana y el jazz; tien una maleta enllena de ritmos ternarios y melodíes seles qu’amesta colos soníos d’Asturies, como la muñeira o la xota. Asina naz lo que presenten como «una fonte d’inspiración inagotable» y de la que destaquen que «componer na llingua de so güela y reivindicar esta cultura minorizada, permíte-y volver a conectar colos sos raigaños y con una tierra que siempre llevó dientro». Si algamen con éxitu la campaña de micromecenalgu, toa esta maleta enllena cantares va poder sonar en toles plataformes dixitales y en CD.



