La música asturiana espárdese pela Península Ibérica: Premios MIN y Dinamiz-ARTj

Catorce artistes qu’usen l’asturianu nes sos composiciones van tener presencia en dos convocatories d’ámbitu estatal: los Premios de la Música Independiente (MIN), nos que tán nominaos L-R, La Bonturné, Mapi Quintana y Nacho Vegas; y el circuitu musical en zones afectaes pola llamada «transición xusta» Dinamiz-ARTj, nel que van participar nesta edición Alienda, Slum Suit, La Bonturné, Llau, Algaire, Héctor Braga, Caldo y Os Rabizos, Deira, Los Gascones, 6 Riales y Cerezal.

Esti miércoles 6 remata’l plazu de les votaciones populares pa los XVI Premios MIN. Nellos tienen nominaciones L-R –Canción del año, Mejor videoclip y Mejor producción musical por «Menodito», Mejor artista y Mejor diseño gráfico por V.O.S-; La Bonturné –Mejor artista emergente, Mejor álbum de música de raíz y Mejor producción musical por A Contraforga-; Mapi Quintana –Mejor canción del año por «Zagaleja» y Mejor álbum de música de raíz por La Maramoniz- y Nacho Vegas, que tien delles nominaciones a los singles en castellanu qu’asoleyó esti añu: «El ángel Simón» y «De púas y cuchillas». Tres de la votación popular, un xuráu escueyerá los finalistes que van dir a la gala final.

Los Premios MIN tán organizaos pola Unión Fonográfica Independiente (UFI) col oxetivu de reconocer la creación y la diversidá musical independiente, ye dicir, aquella que nun forma parte de les multinacionales discográfiques. Esti añu va ser la primer vez que tres proyectos n’asturianu dafechu va competir nestos gallardones, nos que nun hai estayes propies pa la música fecha en llingua asturiana, como sí que les hai pal Mejor Álbum en catalán, euskera y gallegu, amás de que’l Premio a la Mejor Letra Original pue tar escrita en cualquiera de les llingües oficiales, pero non n’asturianu. Destaca que nestos premios Rodrigo Cuevas llevó en 2020 el gallardón a Mejor Artista Emergente y Mejor Álbum con Manual de Cortejo.

11 grupos en Dinamiz-ARTj

Más de 130 municipios de tol Estáu español formen parte de Dinamiz-ARTj, un programa incluyíu na Red Cultural del Instituto para la Transición Justa (ITJ) que nació col enfotu de xenerar una ufierta cultural amplia nos conceyos que s’enmarquen dientro de les llamaes «zones de transición xusta». Tres l’éxitu de la primer edición -con más de 1.000 actuaciones de música, danza y teatru y más de 80.000 espectadores-, na que participaron tres formaciones asturianes; esti añu múltiplicase la presencia de la música’l país: Alienda, Slum Suit, La Bonturné, Llau, Algaire, Héctor Braga, Caldo y Os Rabizos, Deira, Los Gascones, 6 Riales y Cerezal son les bandes que van poder dar conciertos nesta iniciativa del Ministeriu pa la Transición Ecolóxica y el Retu Demográficu .