Xune Elipe: «Un celtismu popular»

Esti ye’l resume de la intervención que Xune Elipe fizo na presentación d’El Celtismu Musical Asturianu el 5 de marzu na llibrería Matadero Uno d’Uviéu.


La cuestión del celtismu n’Asturies ye dalgo que funde los sos raigaños na borrina del tiempu, como mínimu dende’l sieglu XVI, pero ye nel XIX y principios del XX cuando algama un puxu bultable de la mano d’estudiosos del folclor, historiadores, académicos o musicólogos. Nomes como los de Constantino Cabal, Bernardo Acevedo y Huelves, Fermín Canella o Eduardo Martínez Torner son esenciales pa entender esti celtismu históricu. Foron personalidaes venceyaes a entidaes como’l Grupo La Quintana, el Centro de Estudios Asturianos o la Universidá d’Uviéu, que presenten a los celtes, simplificando, como l’«alma» del pueblu asturianu, rescamplando amás les asemeyances con otros países como Irlanda, Escocia, Gales y, especialmente, Bretaña. Ye un celtismu eruditu, venceyáu a una élite cultural y, too hai que lo dicir, con una enclín un tanto esencialista.

«El celtismu ye una de les grandes batalles ganaes por esi asturianismu surdíu hai agora cincuenta años. Un asuntu asumíu sociolóxicamente y que se manifiesta en bien de planos: musical, artísticu, social, institucional, políticu, popular y sentimental»

Col surdimientu a mediaos de los años 70 del sieglu XX del asturianismu modernu, nel que se replantega absolutamente tolo que tenga que ver cola asturianidá, apaez tamién el celtismu contemporáneu nel nuestru país, que naz de la mano del interés pol mesmu a nivel européu nes nacionalidaes celtes nel so conxuntu. Hai un tiempu publicaba un artículu tituláu Ganar ensin ganar nel qu’espresaba la mio opinión sobre la tendencia del asturianismu hacia la tristura/señardá pol nuestru, supuestu, fracasu como movimientu -especialmente nel terrén politicu-, dalgo que nun ye tan asina como pudiera paecer. Ello ye que, dende esi surdimientu (o, si se prefier, resurdimientu) a partir de 1974, cola creación de l’asociación Conceyu Bable, nun fiximos otro qu’influyir decisivamente na sociedá asturiana; nesti sen, la bandera del país aceptada mayoritariamente foi la propuesta naquel momentu, el glayíu «¡Puxa Asturies!» -güei d’usu popular- foi creáu tamién daquella, la reinstauración del nuestru órganu d’autogobiernu -la Xunta Xeneral- foi una de les nuestres peticiones, la recuperación de la fecha del 25 Mayu tamién foi cosa nuestra, hasta na mesma creación de la Comunidá Autónoma «uniprovincial» nótase esta influyencia; son éstos namás unos pocos exemplos de cómo l’asturianismu foi quien a intervenir nel devenir del nuestru país. Y el celtismu ye, precisamente, una de les grandes batalles ganaes por esi asturianismu de nuevu cuñu surdíu hai agora cincuenta años. Un asuntu ésti asumíu sociolóxicamente y que se manifiesta en bien de planos:

  • Musical. Ye onde más repercusión algamó, posibilitando un tiempu pa la nuestra música como nunca enantes y dándo-y la esperanzu del futuru, convirtiéndose nel movimientu sonoru más importante de la historia d’Asturies, en xunto cola Edá d’Oru de la Canción Asturiana del periodu d’ente los sieglos XIX-XX.
  • Artísticu. Con una corriente plástica definida nel que la ornamentación y los motivos celtes son la fonte d’inspiración (ilustradores, pintores, escultores, tallistes, etc.).
  • Social. Nun hai más qu’echar una güeyada a les tiendes de souvenirs pa decatase d’ello, o a les munches firmes comerciales de productos del país qu’utilicen simboloxía céltica (trisqueles, tetrasqueles, tipografía…).
  • Institucional. L’asunción d’Asturies como comunidá celta pola alministración autonómica y les sos instituciones ye dalgo aceptáu ensin mayor probema. Un exemplu: los abondosos hermanamientos ente llugares del país con otros de territorios celtes (Avilés con Sant Nazer -Bretaña-, Morcín con Eskuz -Bretaña-,  Nava con Kloar-Karnoed -Bretaña- o Tazones con An Con -Irlanda-).
  • Políticu. Les rellaciones ente Asturies y el restu de les naciones celtes son a cada vuelta mayores y más intenses. Una muestra recién d’ello ye la iniciativa de les cámares de comerciu del Arcu Atlánticu de proponer la creación d’una Macrorrexón dientro de la Unión Europea, coles posibilidaes qu’abriría d’intercambiu económicu y cultural ente elles.
  • Popular. L’asunción de la nuestra celticidá ye dalgo natural ente toles capes de la sociedá asturiana. Esti celtismu popular ye la gran diferencia col celtismu históricu esclusivamente eruditu al que facíemos mención anteriormente.
  • Sentimental. Hai n’Asturies una sensación xeneralizada de compartir una «sentimentalidá» col ámbitu celta, que se manifiesta nuna manera de ser y de percibir la nuestra rellación, por exemplu, col paisaxe, la naturaleza o la metereoloxía.

«L’interceltismu actual tien como una de les sos máximes el conceptu de mestizaxe, d’apertura al mundu. Nun se zarra sobre sí mesmu, quier una interrellación directa coles otres cultures, ensin intermediarios»

Otra manera, el celtismu contemporáneu refuga dafechu les veleidaes esencialistes que pudieren dase alredor d’él. La derivación del celtismu históricu foi l’interceltismu actual, que tien como una de les sos máximes el conceptu de mestizaxe, d’apertura al mundu. Nun se zarra sobre sí mesmu, pela cueta, quier una interrellación directa y franca coles otres cultures, ensin intermediarios que puedan tracamundiar o tapecer lo que pueden y quieren ufiertar a la comunidá internacional. Una anécdota esclariadora: tando grabando con Dixebra’l nuestru segundu discu, ún de los díes apaeció nuna muria en frente del estudiu una pintada que trayía «Asturias celta», firmada cola típica cruz céltica qu’utilicen los movimientos fascistes y neonazis, pues bien, unos díes depués alboreció correxida como «Asturies 1-Celta 0», tachando la cruz céltica con un trisquel.

«El celtismu ye dalgo de lo meyor que nos pudo pasar, que nos pon nel mundu con una imaxe non enquivocada nin falsiada y que nos ufierta unes posibilidaes de desarrollu y reconocencia bultables. ¿Queremos arrenunciar a ello? y ¿qué alternativa proponen los impugnadores d’esti discursu?»

Nos mios círculos d’amistaes tengo dicho davezu que yo soi un celta de barriu, faciendo referencia a que vengo d’una ciudá industrial y ensin cásique nengún venceyu col mundu rural y campesín, pero interesáu pol celtismu musical qu’utilizó’l rock (el llinguaxe mayoritariu pente la mocedá nos 70-80) como mediu pa esparder el so mensaxe sonoru y, tamien, social. Dicía Alan Stivell que nun podíemos dexar en manes esclusivamente de les multinacionales esa música popular y mayoritaria daquella si queríemos influyir nes xeneraciones moces y facer llegar el nuestru discursu, que lo más afechisco yera interaccionar conxuntamente cola tradición y coles formes sonores modernes si queríemos tener futuru como comunidaes músico-culturales singulares. Soi una especie de celtista pragmáticu que ve les potencialidaes que nos ufierta esti movimientu -y esti escenariu- pa la internacionalización d’Asturies dende ella mesma, ensin intermediarios nin representantes ayenos a nós. El celtismu ye dalgo de lo meyor que nos pudo pasar a los asturianos y asturianes como comunidá humana pequeña y con una capacidá de decisión sobre nós mesmos mínima, que nos pon nel mundu con una imaxe non enquivocada nin falsiada y que nos ufierta unes posibilidaes de desarrollu y reconocencia bultables. Llegaos a esti puntu llanzo dos entrugues: ¿queremos arrenunciar a ello? y ¿qué alternativa proponen los impugnadores d’esti discursu? 

Hebo un tiempu en que la cuestión celta producía grandes alderiques y controversies, momentos d’incomprensión y de prexuicios, que foron desaniciándose a midida que diben quedando a les clares les posibilidaes reales que nos ufierta y qu’hemos ser quién a aprovechar. El celtismu asturianu tien un pasáu fondu, un presente granible y, sobretoo, un futuru esperanzador.

*La semeya qu’acompaña l’artículu ye de la presentación d’El Celtismu Musical Asturianu

Dexa un comentariu

X