Yá ta en toles plataformes musicales y a la venta en musicasturiana.com Dayuri, el trabayu nuevu de Fabes de Mayo. La banda de «folk máxicu instrumental» regresa con diez temes que dan forma a lo que presenten como «un viaxe sonoru a traviés de paisaxes imaxinarios, que crean un soníu envolvente pa somorguiar al oyente nuna atmósfera musical única». La so orixinal propuesta tamién va llevase al directu con tres conciertos yá confirmaos pal mes qu’entra en Xixón y Cabranes.
«Esti discu nuevu ye como un platu bonísimu cocináu a fueu lentu. La incorporación del violenchelu da-y una dimensión emocional y una nueva sensibilidá a los nuestros temes, ufriendo una esperiencia musical más rica y profunda», desplica Melanie Moers, contrabaxista del grupu. D’esta manera, Dayuri fórmenlo «dende pieces enérxiques hasta composiciones emotives», toes elles «conectaes cola tierra». Los cortes son de calter instrumental; sicasí usen delles llingües pa definilos, ente elles l’asturiana, con títulos como «Señaldá» o «Naguar«.
Dayuri yá pue mercase por 12 € en musicasturiana.com -tienda na que tamién tán a la venta unes unidaes llimitaes d’unes fardeles del grupu diseñaes por Laura Bitxo- y nes próximes selmanes va presentase en directo. Fabes de Mayo van tocar el 8 de xunu a les 12.30h en La Münster (Xixón), el 21 de xunu a les 22h en Santolaya de Cabranes y el 22 de xunu a les 22.30h na cafetería cultural xixonesa Toma3.
Un grupu únicu
Fabes de mayo ye un grupu de folk distintu. El so soníu ta más venceyao a sonoridaes orixinaries de la escena musical alternativa, anque enmarcaes nun contestu asturianu que-y aporta identidá autóctona. La so propuesta caracterízase por usar una bayura d’instrumentos como l’ukelele, xilófonu, contrabaxu, acordión, violonchelu o melódica, pa dar forma a unos temes que recuerden a artistes como Yann Tiersen o Penguin Café Orchestra. Debutaron en 2015 con un primer álbum homónimu; tienen dos premios AMAS -meyor discu folk y meyor canción folk-; tocaron nos principales teatros d’Asturies amás d’en espacios como San Mateo, la Noche Blanca d’Uviéu, Radio 3 o la Televisión Nacional de Bégica; y tamién formaron parte de la banda sonora del documental L’Horru, de Jaime Santos. Con Dayuri dan un pasu más nel so camín propiu únicu n’Asturies.
Suscríbite a les nuestres novedaes
