Dos de les propuestes más esperimentales y orixinales de la música asturiana, la de Mapi Quintana con La Maramoniz y la de Melandru, foron les encargaes d’abrir el sábadu 1 de xunu la edición 2024 d’Amosando, el ciclu de presentaciones de novedaes discográfiques impulsáu por musicasturiana.com, con un formatu ente conciertu acústicu con aforu reducíu, programa de televisión y alderique.
A les 12.30h del mediudía entamó La Maramoniz, el cuartetu llideráu por Mapi Quintana y formáu tamién por Sonia Cartón, María Cueva y Juanjo Díaz. Interpretaron cuatro temes del so discu homónimu enllenos de tradición, vanguardia, orixinalidá y emoción.
Per otru llau el grupu post-rock Melandru presentó tres cantares del so EP nuevu, II, con un soníu envolvente, contundente y esperimental nel que tien muncho protagonismu los efectos y les programaciones.
El públicu asistente pudo disfrutar d’un conciertu especial, nel que se llendó l’aforu a una decena de persones y nun espaciu bien distintu y underground como son Les Naves d’El Natahoyo.
Cinco ediciones y 26 artistes
Amosando nació en marzu de 2019 a idea de la plataforma musicasturiana.com. Nes cinco ediciones anteriores tocaron 26 artistes pa presentar les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel, Algaire, Mostru L’Horru, Slum Suit, La Garrapiella, La Bonturné, Antón Menchaca y 6 Riales. La suma de los videos de los conciertos algama más de 360.000 reproducciones en YouTube.
Estes actuaciones amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, realizada audiovisualmente por Javi Lueje y Rubén Álvarez y subvencionada pola Conseyería de Cultura, Política Llingüística y Deporte del Principáu d’Asturies..
Suscríbite a les nuestres novedaes
