Dende esta selmana yá tán disponibles en plataformes musicales dos trabayos del colectivu de música tradicional Muyeres: Pasamentu (2001) y Onde canta la culiebra (2006), editaos pol sellu Fono Astur. Cola dixitalización d’estos discos por parte de Musicasturiana.com, el patrimoniu musical tradicional asturianu sigue espardiéndose per tolos países del mundu.
Muyeres entamó’l so camín en 1993 col oxetivu de reivindicar el protagonismu de les muyeres na tradición oral y poner en valor la música de percusión d’Asturies. Nestes más de tres décades dende que se formó’l proyectu, participaron más de 150 muyeres y collaboradores. Pasamentu foi’l so tercer trabayu, un doble discu asoleyáu en 2001. Nél pueden sentise ramos, dances, xotes, xiraldilles, muñeires, sones d’arriba, agarraos, dellos exemplos de tonada na voz de Mariluz Cristóbal Caunedo y otros cantares pal baille.
En 2006 continúen cola xera d’investigación etnográfica y espublicen Onde canta la culiebra, un doble discu col que siguen la senda de Pasamentu, la recopilación y interpretación de cantares tradicionales de les tres zones del país: rumbes, agarraos, guinaldos, ramos, añaes, vaqueiras, música pal baille a lo suelto y más melodíes. Dambes grabaciones foron y son un exerciciu de memoria imprescindible, la representación del perimportante trabayu etnográficu que los distintos grupos y colectivos ficieron pa caltener y interpretar el patrimoniu oral y musical del país.
Merca los discos de Muyeres
Suscríbite a les nuestres novedaes
