Va unes selmanes presentábase de manera simultánea, nel IV Encontro Celme de Zanfona (Lugo) y nel V Encontro Profesional de Música Galiza-Portugal MUMI Músicas no Minho (Tui), la película documental titulada Na procura do son perdido. A memoria da Transición. La obra ta dirixida por Ramón Pinheiro, producida pol Consello da Cultura Galega y realizada por aCentral Folque-Centro Galego de Música Popular y la productora audiovisual Aqueladas. Nos próximos meses va percorrer distintos llugares del país vecín.
El documental, conducíu pola periodista y escritora María Xosé Porteiro, cuenta colos testimonios de músicos y artesanos que protagonizaron de manera directa’l resurdir de la zanfoña nes décades de 1970 y 1980, dándo-y forma a un capítulu perimportante de la cultura musical gallega xeneráu nel contestu de la Transición política. Ente los participantes tán Antón Corral, Miro Casabella, Carlos Villanueva, Xosé L. Rivas Cruz (Fuxan os ventos), Pablo Quintana (folclorista y músicu nacíu en Tramundi), Luciano Pérez (Obradoiro da Deputación de Lugo) o Emilio Cao. Tamién tán presentes dellos miembros del grupu didácticu de Zanfonas da Escola de Gaitas de Ortigueira, pioneru na recuperación y promoción del instrumentu.
Ente los aspectos trataos destaquen colectivos y temes como Voces Ceibes o’l Movemento da Canción Popular Galega, el celtismu, la música antigua, la investigación y rehabilitación del instrumental tradicional y históricu o’l trabayu de recoyida de los cantos de tresmisión oral, amás de les principales escenes renovadores de la música gallega na Transición, venceyaes a la música tradicional y en particular a esti instrumentu con un valor simbólicu bien grande. Amás d’axuntar un bon númberu de declaraciones, el documental inclúi imáxenes de la época cedíes polos propios protagonistes, archivos particulares y públicos, delles inédites que ven la lluz per primer vez.
Suscríbite a les nuestres novedaes
