El sábadu 29 de payares los Kuivi Almacenes d’Uviéu van acoyer Artístiques, festival gratuitu entamáu por Puru Remangu y Ixuxú Cultura qu’axunta artes escéniques, música, artes plástiques, mocedá, diversidá llingüística y feminismu. Na estaya musical, amás de la 1ª Muestra d’Asturianada Electrónica, van participar dos artistes moces foriates: la gallega Catuxa Salom y la euskaldun Süne; dos propuestes qu’entemecen la música de raigañu de los sos territorios con otros sones como la electrónica y los ritmos llatinoamericanos.
Catuxa Salom ye una mestura de ritmos indíxenes arxentinos, música tradicional gallega y bases electróniques enérxiques. Enriba d’un escenariu ufre una esperiencia visual y sonora envolvente, con una puesta n’escena cuidada y la fuercia d’un tríu de percusiones, contrabaxu y sintetizadores.
Per otru llau, dempués de petalo mui muncho col grupu Huntza, Süne tien agora esti proyectu nel qu’avera’l soníu de la trikitixa (cordión diatónica vasca) a sonoridaes electróniques. Una propuesta enllena de fuercia, carácter y na que la tradición reformúlase pa poner al públicu blincar y falar n’euskera de temes como l’empoderamientu femenín o la llibertá.
«Tamos mui arguyoses de la nuestra cultura y identidá y préstanos pola vida compartila con otros pueblos del mundu. Faciéndolo amás en situaciones d’igualdá (porque nenguna cultura o llingua debería ser más válida qu’otra). Tamién nos encanta conocer realidaes d’otros territorios y por eso p’Artístiques convidamos a dos artistes foriates, Catuxa Salom y Süne, que van ponenos a baillar colos sos conciertos qu’amuesen interculturalidá, renovación de la tradición, arguyu polo propio y muncho flow y remangu«, despliquen dende Puru Remangu pa presentar por qué cuntaron con estes artistes de fuera nel so cartelu.
Amás d’elles, la representación musical asturiana va sonar cola 1ª Muestra d’Asturianada Electrónica na que van interpretase seis pieces inédites coles voces d’Alicia Villanueva y Lucía Rojo, la música de Llevólu’l Sumiciu y Fruela 757 y les lletres de Blanca Fernández, Marina Pangua y Ánxela d’Ávila. Too ello por oxetivu actualizar los mensaxes de la tonada, despertar l’interés por el xéneru nos públicos xóvenes, fomentar el relevu xeneracional nos escenarios y sofitar la creación lliteraria.
Suscríbite a les nuestres novedaes
