Del 11 al 13 d’ochobre Candás va acoyer la tercer edición del Reguerada Fest, feria d’empreses, lliteratura, música, artes visuales y escéniques y gastronomía qu’entama la Conseyería de Cultura, Política Llingüística y Deporte cola coordinación del músicu y escritor Xaime Martínez. Dientro de la programación va haber espaciu pa la música’l país colos conciertos de Marisa Valle Roso, Alicia Álvarez, Skama la Rede y David Varela; el pasucáis del Grupu de Baille San Félix; l’alderique ‘La difusión de la cultura asturiana’, los talleres de Pau Santirso y Vero Rubio, y el recital Poesía electrónica.
La Fábrica d’Ortiz va ser l’escenariu de les actividaes rellacionaes cola música asturiana del III Reguerada Fest. A les 17.30h del vienres 11, David Varela inaugura les actividades pa la reciella con un conciertu didácticu. Esi mesmu día a les 20.30h va actuar la cantautora y intérprete d’asturianada Marisa Valle Roso.
L’espectáculu de cai Llamando a conceyu del Grupu de Baille San Félix abre la programación del sábadu 12 a les 11.30h. Una hora dempués, la Fabrica d’Ortiz acueye l’alderique ‘La difusión de la música asturiana‘ cola participación de Xicu Ariza -coordinador de musicasturiana.com-, Marta Mori, Marcos García Alonso y Alma Hidalgo. A les 13.30h, Pau Santirso va impartir un taller d’iniciación al baille tradicional y, a les 18.30h, Vero Rubio va dar una formación sobre composición col títulu ‘Canto’l miou cantar’. El conciertu de Skama la Rede zarra les actividaes de la segunda xornada a les 20.30h.
L’axenda musical del Reguerada Fest pal domingu 13 entama col conciertu Canciones pa la xentiquina. Una selección sentimental de Nacho Fonseca d’Alicia Álvarez a les 12.30h. La DJ Güeriata va poner la música nel recital ‘Poesía electrónica‘ -13.30h- nel que van tar tamién Xuan Xosé Sánchez Vicente, Marisa López Diz y Beatriz Quintana Coro. El pieslle del festival va aportar a les 14.30h dempués d’una danza prima.
Suscríbite a les nuestres novedaes
