Yá ta a la venta Flashback, la obra cola que Dolfo Camilo Díaz ganó’l Premiu Pachín de Melás de Testos Teatrales. Trátase d’un musical que, en pallabres de la editorial Impronta, «podía ser un llibru d’autoayuda, una novela romántica o, inclusive, una colección d’haikus… Pero nun lo ye. Flashback namás ye una comedia que fala d’una traxedia«. La traxedia ye la de la corrupción, la minería, el sindicalerismu, el pih.oterismu… too ello personificao nel protagonista de la obra: Don. Cenciellamente, Don. El musical recueye 12 cantares con «lletres gamberres» del propiu Camilo Díaz y, anque na so tiesta inspiróse na música italiana, l’escritor afirma que si hai dalguna compañía que ponga’l testu enriba d’un escenariu pue face-yos «una música ad-hoc y esclusiva».
Yes ún de los grandes escritores de la lliteratura asturiana y tas avezáu a trabayar dellos xéneros. ¿A ónde se remonta la to carrera escribiendo musicales?
El primer musical qu´escribí y representé foi Una historia del teatru (tamién titulada Terapia) nel 1981. Escribila pal Coleutivu Teatral Güestia y tando en plenes representaciones nació, ya nel 1983, el Grupu de Rock Güextia (Lluisfer, Cristian Tolin, Manu Tamargo, Freddy Sánchez y yo). Tratábase d´una comedia kañera y koñona que cuntaba una particular historia de lo teatral, dende los clásicos griegos al teatru del asurdu del pasáu sieglu. Depués, nel 1983, escribí Clarín Falaba col Güercu, una (per)versión de La Rexenta que presentare d’aquella pa estrenar n’Uviéu. Pa ello faláremos cola conceyala de Cultura de la dómina, Aurora Puente, presuntamente del Partíu Comunista, que me sacó del despachu (pura sociollingüística pa entender tiempos y espacios) señalando que n’Uviéu nun prestaba´l rock y muncho menos nuna llingua que naide nun falaba… D’esi musical quedaron pa los restos dos temes que formaron parte del Discu Inaux (‘Ana Ozores suaña Vetusta’ y ‘El Neñu’). D’aquella p’anguaño nacieron otros seis musicales, tres d’ellos infantiles (el penúltimu, L‘Elefante Tante d’Esther García qu’estrené nel 2023).
¿Qué particularidaes tien escribir un musical en comparación con otros xéneros teatrales?
Por obvies razones -axunta tolos formatos escénicos posibles: teatru, danza, música…- ye más complexo y trabayoso. Sicasí, siéntome especialmente a gusto nel formatu porque pueo entemecer aquellos elementos creativos que más me presten, que más me motiven: la música, el teatru… Equí pa enriba axúntase´l que tocamos un asuntu doliosamente real -como dicimos nes presentaciones: Flashback ye una historia real, cualesquier paecíu cola fantasía ye pura coincidencia- y eso desixe un apartáu de documentación seriu, rigorosu, qu’en nengún casu la sorrisa, la risa o la carcaxada puen atapar…
«La conceyala de Cultura de d’aquella, presuntamente del Partíu Comunista, sacóme del despachu señalando que n’Uviéu nun prestaba’l rock y muncho menos nuna llingua naide nun falaba»
¿Qué reflexen les doce lletres de los cantares?
Son una mirada alternativa al mesmu testu. Podríemos sintir namás que la música, que taremos sintiendo la obra, y al revés, podríemos prescindir de los cantares, que taremos sintiendo la música. Poro, axuntando les dos manifestaciones creatives y interpretatives que se proponen en Flashback creo que multiplico la so fuercia, el so interés, la so recarga áceda y crítica. Flashback, como señala la contraportada, nun dexa de ser una comedia que fala d’una traxedia… Y esa traxedia llámase corrupción, pal casu, la podrén que determinaos personaxes bien conocíos -que protagonicen la propuesta y que, por cierto, ya foron parte d´otros proyectos míos anteriores como la polémica País, qu’estrenó hai venti años Teatru Casona y que foi l’últimu espectáculu teatral abiertamente censuráu nesti país polo secuaces de los corruptos qu’apaecíen nel montaxe-, aprovechando necesidaes y desesperes de base y los fondos ensin fondu de los fondos mineros, foron quien a xenerar, dinamitando mítiques mineres y d’un movimientu obreru que, gracies a toles dioses, ta mui perriba de lo qu’esos corruptos podríen representar.
Los 12 cantares de Flashback cunten determinaes situaciones protagonizaes por esos corruptos: les perres marafundiaes, los spa que tanto-yos rentaron, la traición a verdaderos sindicalistes, a verdaderos mineros, a la memoria del país… Y eso sí, con lletres onde domina’l sarcasmu más absolutu porque, como perbién dixo Alejandro Casona, “Nun hai nada tan grave que nun se puea dicir con una sorrisa”
«Axuntando les dos manifestaciones creatives y interpretatives que se proponen en Flashback creo que multiplico la so fuercia, el so interés, la so recarga áceda y crítica. Nun dexa de ser una comedia que fala d’una traxedia»
¿En qué t’inspirasti musicalmente pa escribir les lletres y a qué estilu suenen na to tiesta?
El sindicalista corruptu que protagoniza Flashback nun sabe que lo ye y nun lo quier saber. Funciona como un capo a la siciliana o como un xefe de la Camorra… Tanto ye asina la cosa, qu’en nengún momentu s’enseña pol so nome: llámase y llámenlu ‘Il don’… Poro, él siente na so mollera cantares italianos, nun sabe por qué… Y de mano foron esos cantares italianos -bien conocíos: de Riccardo Cocciante a Umberto Tozzi; de Valeria Rossi a Mina…- sobre los que trabayé unes lletres gamberres.
El contraste que-y propones al potencial espectador o llector, ente melodíes que son parte de la banda sonora emocional y sentimental de munchos d’ellos con unes lletres incendiaries, fai que’l cerebru pegue una españida que mos obligue a pensar, precisamente, no que se cunta nes lletres. Nun quita ello -y asina lo plantegamos na mesma publicación- pa qu’eses lletres puean ser cantaes siguiendo los patrones de los cantares italianos propuestos, o bien pa que se-yos faiga una música ad-hoc y esclusiva o que seyan lletres declamaes -en formatu rap o en formatu poesía declamada al usu-.
Too dependerá d’intereses estéticos de la mesma compañía qu’asuma’l so montaxe o del nivel de producción que se tenga… Sicasí, yá ves que yo, nes presentaciones de la publicación, avezo desarrollar una performance y nesi performance canto tres o cuatro temes que s’axusten a esos cantares italianos -‘El Xardín Prohibío’, ‘Yo quiero veti danciar’ etc.- o dalgún cantar míu dafechu tanto na lletra como na música p’amosar eses estremaes posibilidaes y potencialidaes…
«Nes presentaciones de la publicación, avezo desarrollar una performance na que canto temes que s’axusten a cantares italianos o dalgún cantar míu p’amosar eses estremaes posibilidaes y potencialidaes»
Si se llega poner n’escena, ¿tienes preferencia por dalgún estilu o artista? ¿Hai probabilidaes de ponelo n’escena?
El Premiu de Teatru Pachín de Melás, amás del premiu en metálicu y la publicación de la obra, contempla la posible coproducción del espectáculu con compañía profesional… Poro, tando neses, sí que confío de ver Flashback nel 2025 enriba d’un escenariu… Y toi convencíu que pue funcionar perbién. Tocante a les preferencies, sí, claro: como teatreru que soi desque me recuerdo y como profesional de la escena como Xestor Cultural y Programador, conozo y estimo bien la escena asturiana y soi amigu y admirador d’auténticos mostros de la escena del país como Alberto Rodríguez, Laura Iglesia, Félix Corcuera, Arantxa Ramos, Verónica Gutiérrez, Andrés Presumido…
Suscríbite a les nuestres novedaes
