Nel 2000 facía unos venticinco años del surdimientu de l’asociación Conceyu Bable, que da orixe a una fase nueva de la música asturiana, anovando los sos postulaos, tanto estilísticos como temáticos y ideolóxicos. Naquel momentu ya contábemos con un bagaxe bultable na escena sonora llariega, con un movimientu folk mui potente, otros estilos abriéndose camín y unes mínimes infraestructures (discográfiques, cirtuitu, estudios de grabación, promotores…). Taba acabante de producise’l fenómenu Hevia, con un impactu descomanáu que permitió una internacionalización de la música asturiana como nunca enantes na so historia. Too ello ensin un apoyu afechiscu de l’alministración pública y una promoción mediática insuficiente, sacante’l casu del gaiteru maliayu. Poro, otra vuelta más, foi la propia escena la qu’afaló la creación d’un órganu de comunicación propiu, faciendo de catalizadora la compañía Discos L’Aguañaz -anguaño integrada en Goxe Producciones-. La producción, eventos, repercusión social y hasta la incidencia económica que taba algamando la nuestra escena musical facíen necesariu un proyectu d’esi calter.
La creación del Anuariu de la Música Asturiana vieno a enllenar un güecu vacíu nel sistema musical del país. La so nacencia taba condicionada pol enfotu de serviciu públicu, la promoción integral, la falta de teorización sobre la música contemporánea asturiana, los estudios nuevos sobre ella y la necesidá de crear un públicu estable. Con estes blimes fuimos afitando, espardiendo y ameyorando una publicación que’l tiempu dio en facer imprescindible pa una mayor y meyor conocencia del fechu musical asturianu. A lo llargo d’esti periodu tenemos garráu’l pulsu añu a añu a la nuestra escena, creando y divulgando conceptos como’l de música d’espresión asturiana p’afinar sobre la materia a tratar, asignándo-y un conteníu concretu, asina entendemos que del sistema musical asturianu fadríen parte toes aquelles propuestes sonores venceyaes a la tradición, les que la reellaboren o s’inspiren nella y, tamién, les qu’empleguen como vehículos de creacion a les nuestres llingües propies -asturianu y gallego-asturianu- independientemente del estilu que seya.
L’Anuariu de la Música Asturiana cumple agora venticinco años de xera ininterrumpida, nin siquiera nos años gafos de la crisis económica o de la pandemia dexó d’apaecer, adaptándose a les circunstancies, variando’l formatu y ampliando conteníos. La nómina de collaboradores inclúi a les persones más significatives de la nuestra música, teorizando sobre ella, aportando argumentariu, faciendo denuncies y proponiendo llinies a siguir. Too ello siempre con una visión amplia y plural, dándo-y un tratamientu global y integrador. Cada volume publicáu recueye’l pálpitu d’un movimientu orixinal, tresformador y vertebrador de la identidá asturiana. Cada llinia de les sos páxines ta escrita dende la querencia más sincera y fonda por una de les señes distintives del nuestru país.
Suscríbite a les nuestres novedaes
