Estos son los eventos pal puente y lo que queda d’avientu

Xixón, Llangréu, Teberga, Llanera, Llanes, Avilés, Uviéu y Villaviciosa acueyen los 16 eventos de música asturiana qu'hai hasta'l final d'añu.

Eventos

Dende güei hasta’l fin d’avientu hai once conciertos programaos y otros cinco eventos qu’axunten xéneros y estilos estremaos nos conceyos de Xixón, Llangréu, Teberga, Llanera, Llanes, Avilés, Uviéu y Villaviciosa. Les cites entamen güei a les 19h cola presentación del llibru de Leticia Baselgas Diarios d’una panderetera en Xixón. De siguío, Bada&Muñalén toquen na sala Meidinerz Jazz Club, tamién en Xixón, a les 22h. Pero otru llau, esta tarde de xueves, a les 20h, Bimenes Underprau entama en L’Artesana de La Felguera una Nueche de pinceles xunto a l’artista Paula Ha. Esti fin de selmana llargu zarra l’axenda col conciertu de La Bedur en Taberna Narciso a les 13h el domingu 8, onde van presentar el so primer llibru-discu.

Avientu sigue con cuatro eventos el vienres 13: la presentación de Diarios d’una panderetera en Matadero Uno a les 19h, el conciertu de Vero Rubio en Posada Llanera a la mesma hora, l’actuación de La Bonturné dientro del ciclu Dinamizartj en La Felguera a les 20h, y el conciertu de presentación de Páxaros 01 de Ferla Megía nel Casino de Llanes. Al otru día, Llevólu’l Sumiciu xúbense al escenariu de Llanes a les 20h -como Ferla Megía-. El sábadu 21 conflúin tres cites bien estremaes. Per un llau, Sara Friera, Daniela Cohen, Sofía Castañón y Jimena Menéndez estrenen el so espectáculu poético-musical Ser quien a cantar nel Llaboral Centru d’Arte y Creación Industrial a les 17.30h. Per otru, 6 Riales actúen con Dinamizartj nel Cine Marvi de Tinéu a les 19h. Per último, el Centru Niemeyer acueye l’estrenu de la zarzuela Carretera de Avilés a les 20.30h.

Les feches navidiegues inaugúranse con música asturiana gracies a la sesión vermú qu’entamen Soi Panderetera na plaza de La Corrada de Cimavilla a les 13h del martes 24. Pa finar la temporada de conciertos d’esti añu, hai tres cites el sábadu 28 d’avientu: Dixebra na Sala Tribeca d’Uviéu a les 19.30h, la Nueche en Danza Navidiega de Villaviciosa y el doble conciertu de los artistes mozos Ferla Megía y Llevólu’l Sumiciu en La Salvaje (Uviéu) a les 21h.