Va unes selmanes presentóse nes redes sociales de l’asociación pal desarrollu rural El Prial la iniciativa Fai falta xente nos pueblos. ¡Alquila ho!. A traviés de dellos videos esta campaña convida a la xente que tien propiedaes nel mundu rural a poneles n’alquiler p’asina valtar el problema d’accesu a la vivienda nel mundu rural y el despoblamientu. La música asturiana ta teniendo’l protagonismu nestos videos nos qu’apaecen hasta’l momentu Rodrigo Cuevas, Xosé Antón Ambás y Pau Santirso, amás de la escritora Arantza Margolles.
«Munches cases zarraes son un pueblu que muerre. Y munchos pueblos que muerren son un país ensin futuru. N’Asturies tenemos un problema mui grande d’accesu a la vivienda nel mediu rural. Hai munches cases vacíes y hai muncha xente buscando una casa que nun alcuentra«. L’axitador folclóricu Rodrigo Cuevas ye’l que llanza esti mensaxe n’ún de los videos.
Tamién fala’l músicu y estudiosu de la cultura tradicional Xosé Antón Ambás de «la soledá» que xenera esta problemática: «Yo qu’ando Astuires arriba y abaxo alcuentro cada día la quexa de los que van quedando pelos pueblos. Siempre me dicen ‘Ambás, quedamos solos, zarraron toles cases. Nun tenemos ni con quien falar nin queda quien nos eche un gabitu'». Esta cuestión, trátala tamién el pandereteru y baillador Pau Santirso cuando diz que «varies cases pesllaes, son una escuelina que zarra, una plaza ensin xuegos«.
Volver al pueblu
La conclusión d’esta campaña sofitada pola Conseyería de Presidencia, Retu Demográficu, Igualdá y Turismu ye que «si quies un pueblu vivu, fai que’l tu pueblu tea llenu de vida», y por eso estes cares visibles de la música asturiana llamen a poner cases n’alquiler. Pa ello ponse a disposición la web volveralpueblo, el teléfonu 985710094 y el corréu a volveralpueblo.prial@gmail.com.
Suscríbite a les nuestres novedaes
