Corquiéu ye una de les bandes folk más icóniques y con más historia de la escena asturiana. Entamaron el so camín en 1997 en Ribeseya y, dende entós, asoleyaron tres discos –La Barquera (2000), Salia (2005) y Suaña (2010)-, amás d’un compilatoriu con Musicasturiana.com pa celebrar los sos 20 años de llabor (2017) y el cenciellu ‘Villa Antroxada’ (2023). Nestes décades d’actividá algamaron un soníu personal, propiu y característicu basáu na tradición musical asturiana y la so convivencia coles influyencies d’otres músiques de raigañu del Arcu Atlánticu, componiendo y interpretando una bayura de temes instrumentales con testures complexes y cantares vocalmente esixentes con lletres perconocíes de Xandru Martino.
Dempués d’un parón d’actividá pública de dellos años, tornaron a los escenarios en setiembre de 2024 nel Festival Internacional de la Gaita de Villaviciosa y, un mes dempués, Ribeseya acoyólos nel Festival de la Sidre, un contestu especial pal grupu. Díes dempués dieron anuncia de la marcha de la que fuera la so cantante mientres once años, Lluci G. Palomares. Sicasí, abrieron esti 2025 cola formación anovada, incorporando oficialmente a Celia Nieto al vigulín -que yá venía tocando con ellos dende l’añu anterior- y la voz d’Alba Gutiérrez. Va delles selmanes volvieron a grabar nos Tutu Estudios de Corvera y, p’afondar en too ello falamos con Rigu Suárez, gaiteru y fundador de Corquiéu.
Tornastis a los escenarios en setiembre dempués de malpenes dos años de parón d’actividá pública, ¿qué pasó nesi intre? ¿Cuándo foi’l vuestru últimu conciertu enantes de la vuelta nel FIG?
Corquiéu paramos de tocar en directo por dellos factores. Les circunstancies personales de pesu de dalgunos componentes requeríen de tiempu p’alcontrar esi ánimu. Nesi momentu valoramos muncho’l tema de la vuelta, dalgunos queríen y otros non; les coses son asina. Falábamos muncho de que yá taba bien de tocar siempre lo mesmo, entá más teniendo nuevos temes fechos. El grupu paró d’actuar n’escenarios pero enxamás paró de crear porque ye parte de nós.
L’últimu conciertu foi nel Festival Intercélticu d’Avilés. Tábamos tocando meyor que nunca y a puntu yá de reservar pa entrar a grabar; yá-y comentáramos a Tutu Estudios pa que nos diera fecha y, de sópitu, plof… pandemia, y diferentes circunstancies personales esternes al grupu frenáronnos. Los festivales nunca dexaron de llamanos pero nun concebíamos tocar pa xente sentao y con mázcares. Non.
«Cuando l’últimu conciertu n’Avilés tábamos tocando meyor que nunca, a puntu d’entrar a grabar, y aportó de sópitu la pandemia. Los festivales nunca dexaron de llamanos pero nun concebíamos tocar pa xente sentao y con mázcares»
¿Por qué decidistis volver agora?
Por munchos motivos diferentes, pero unu fundamental y definitivu. David Muñiz del FIG tuvo llamándonos añu tres añu pa tocar nel festival, incluso llegó a dicinos «tocái media hora si queréis, a la hora que queráis y el día que prefiráis, pero sois necesarios nel panorama y facéis muncha falta». Eses pallabres llegáronnos al alma. En consecuencia, decidimos quedar pa ensayar y preparar esi conciertu como si nos fuera la vida nello, danos una nueva oportunidá y ver reacciones del públicu nuevamente. Tuvimos que buscar rápidamente una persona col vigulín pal grupu.
Per otru llau, pensamos que teníamos cientos d’hores de trabayu nesti respertoriu nuevu y yera una pena que nun quedera grabao. Entamamos asina a motivanos y punxímonos rápidamente a desempolvar los temes nuevos, los vieyos y ¡los deos! Cuando pares unos años cuesta muncho volver. En tou esi tiempu llamáronnos dalgunos festivales p’actuar, colo que sabíamos qu’había munchu interes en nós. La conxunción de factores foi favorable y volvimos. Gracies a David Muñiz, ensin dulda.
El conciertu foi mui emotivu pa nós porque tocar nel FIG ye casi como tocar en casa, el meyor sitiu posible pa tornar. Vimos a la xente sofitándonos y ilusionada, y decidimos siguir un poco más. Dempués yá vino’l Xixón Folk, la Folixa la Sidre…
«David Muñiz, del FIG, tuvo llamándonos añu tres añu pa tocar nel festival. Les sos pallabres llegáronnos al alma y decidimos preparar esi conciertu como si nos fuera la vida nello. Foi mui emotivo pa nós, el meyor sitiu posible pa tornar»
Nestos meses atrás disteis anuncia de la incorporación de Celia Nieto al vigulín y la cantante Alba Gutiérrez, ¿qué tán aportando dambes a esta etapa nueva del grupu?
Estes dos incorporaciones foron claves pal proyectu porque quedamos con dos vacíos importantes: el vigulín y la voz. Esto fízonos reaccionar rápidamente y Dani Álvarez propunxo falar con Celia Nieto, una vigulinera escelente qu’él conocía de les jam session. Celia aceptó, daqué que mos fizo muncha ilusión, yá non namás pola calidá musical que tien, sinón pola so forma de ser. Deprendió 22 temes en cuatro meses, más los nuevos, y l’aportación foi constante dende’l primer día. La base d’un grupu ye l’aportación musical, la intuición de tolos miembros y tar musicalmente conectaos y concentraos nel soníu del grupu.
La siguiente en llegar foi Alba. Pillónos por sorpresa totalmente, tábamos a piques de suspender el conciertu de Coo de Buelna (Cantabria) porque nun teníamos voz, pero la carta de presentación d’Alba foi perbona. Mandónos tolos temes cantaos dende la cocina casa enrima los discos, ensin filtros, y díxonos que si nos gustaba que s’ufría encantada a cantar con nós, que yera siguidora del grupu dende neña. Deprendió prácticamente tolos temes del grupu, un llabor bultable. Yo tresmitílo a los compañeros y nel ensayu conectó dende’l primer tema. Asina decidimos que, anque arriesgando, debutara nel últimu conciertu del añu, y pasó lo que suponíamos: gustó muncho. Foi too mui rápido, en 10 díes pasamos de nun tener cantante a que debutara Alba in extremis nesi conciertu.
¿Aportaciones? Pues aporten de too: calidá musical y humana, sentíu de la responsabilidá y respetu hacia la hestoria d’esti grupu. No musical hai un arriquecimientu perguapu nel sector melódicu y vocal. Alba, cola so voz, encáxanos perbién porque sigue una llinia continuista a lo grabao nos discos. Volver a esi contestu prestónos muncho. L’aportación creativa de dambes tamién ye pergrande, nos temes nuevos consiguieron apurrir la so esencia rápidamente. Son arreglistes, componen, dominen los sos instrumentos y son mui intuitives.
Amás, queremos amosar el nuestru agradecimientu a les persones que s’ofrecieron a cantar con nós -unes cuantes- y el trabayu que ficieron pa con nós. Tamos mui agradecíos, son grandes cantantes con un futuru esperanzador pa la música asturiana.
«Les incorporaciones de Celia y Alba foron claves pal proyectu. La so aportación creativa ye pergrande, nos temes nuevos apurrieron la so esencia rápidamente. Son arreglistes, componen, dominen los sos instrumentos y son mui intuitives»
Tais acabantes de grabar dellos temes en Tutu, ¿cuándo vamos poder sentilos? ¿Van salir como cenciellos, en formatu EP o LP?
Los temes tán agora mesmo en procesu de mezcla y masterización; la idea ye sacalos enantes del branu. Ente mayu y xunu verán la lluz en toles plataformes dixitales.
En principio, vamos sacar varios temes en cenciellos pero mui contundentes que resumen perfeutamente’l soníu actual del grupu, más próximu al de los anicios. Dempués, si va too como esperamos, asoleyaremos otra tanda de temes nuevos hasta llegar al formatu físicu a finales d’añu o entamos del viniente. Lo de los plazos ye mui relativo nel mundu de la música.
Avanzastis tamién que va haber cantares con lletra y temes instrumentales, ¿cómo foi volver a componer y facer arreglos pa Corquiéu dempués del vuestru últimu single de 2023? ¿Contasteis con dalguna collaboración nel procesu de creación?
Realmente, grabamos temes que pa vós sedrán nuevos pero pa nós son vieyos porque lleven años fechos; otros sedrán dafechamente nuevos y, incluso, dalgunos tán entamando a medrar nesti 2025. Ver cómo va naciendo un tema de la nada ye daqué perprestoso y motivador. La llinia ye la de siempre: balaes vocales con muncha instrumentación, sets instrumentales enérxicos, munchu diálogu melódicu y lletres de Xandru Martino. Pel momentu nun contamos con denguna collaboración pa los temes nuevos que van salir, anque pa los próximos yá tenemos xente en mente.
«Grabamos temes que pa vós sedrán nuevos pero pa nós son vieyos porque lleven años fechos. La llinia ye la de siempre: balaes vocales con muncha instrumentación, sets instrumentales enérxicos, munchu diálogu melódicu y lletres de Xandru Martino»
Nesi sen, ¿va haber novedaes nel soníu?
La novedá ye qu’usamos pedal de bombu mesmo en directo como n’estudiu, amás de les aportaciones de Celia y Alba. Los demás siguimos na nuesa llinia de creación, aportación y interpretación. Nel estudiu sí qu’incluyimos dalguna cosina interesante a efectos de soníu y emplegamos dalgún instrumentu nuevu; pequeños detalles pero mui llamaderos nuna escucha global.
Pa finar, ¿vamos poder vevos en directo ceo? ¿Ónde?
Anque namás puedo anunciar que taremos nel Folkomillas (Cantabria) el vienres 20 de xunu y otra’l 28 de xunu nel Zarréu Fest; tamién tenemos el 3 de mayu y el 5 de xunetu n’Asturies. Otres tán pendientes de confirmación. Vamos dir pasín ente pasu rodándonos pa ver si llegamos a sonar como tenemos en mente. Tamos con muncha gana, fuercia y ilusión.
Suscríbite a les nuestres novedaes
