Tres d’un branu intensu nel qu’actuaron n’eventos tan destacaos como’l 42 Festival Intercéltico do Morrazo, el Festival Intercéltico d’Occidente o los Alcuentros de Música Tradicional Aurelio Argel, Corquiéu continúen esti mes xubiendo a escenarios. La mítica formación folk ribeseyana va tocar el vienres 11 nel festival Gastrosónica y el vienres 18 en Cangues d’Onís, nel que s’anticipa como un conciertu mui especial.
«Nun va ser otru conciertu más… Va ser un día perespecial pa nós gracies a Cangues d’Onís porque ofreciéronnos tocar n’El Zanjón, el barriu de la madre de Rigu que da nome al tema compuestu pol grupu n’honor a ella. Un día d’emociones, música y tradición», desplicaron Corquiéu en redes sociales en rellación al conciertu que van dar el viernes 18 a les 21h. L’actividá forma parte de los actos pol Día d’Asturies qu’entama’l Conceyu canguetu y, amás del grupu folk, actúen a les 20.30h l’Asociación Folclórica Picos d’Europa y la Banda de Gaites Bricial de Cangues d’Onís.
D’otra banda, del 11 al 13 setiembre vuelve a Les Arriondes Gastrosónica, festival «del son, saber y saber del conceyu de parres», qu’axunta esperiencies gastronómiques, música y arte culinariu parragués. La organización d’esti eventu ta acabante d’anunciar que Corquiéu van ser los cabezaleros d’esta segunda edición. Toquen a les 23h nel Parque La Llera y próximamente van anunciase otres actuaciones.
Corquiéu aportó a la escena n’acabando los 90 y namás ficieron falta trés discos pa consideralos una pieza fundamental del folk asturianu. Siguiendo’l formatu de grupos como Llan de Cubel y Felpeyu, una formación grande y col estilu de rasguéu ‘folkie’ de les cuerdes, pero desendolcando una sonoridá propia, bien ceo foi ún de los grupos que llevó la so música fuera d’Asturies, espardiéndola en xires europees. Corquiéu ye ‘folk cañón’, pero tamién son balaes que calaron na memoria del públicu, y que güei son himnos d’esos que puede cantar una carpa entera, como ‘La Viquina’.
Aquel grupu qu’entamó a surdir l’añu que Rigu Suárez dedicó toles selmanes a dir al Ayuntamientu de Ribeseya a preguntar cuándo diben poner un profesor de gaita, acabó, gracies a esa pasión de tolos miembros que pasaron pela formación, grabando trés discos: La Barquera (2000), Salia (2005), y Suaña (2010), xunto a El Zanjón, un EP de trés temes que sacaren l’añu pasáu (2025); una discografía d’eses enllenes de temes míticos.
Suscríbite a les nuestres novedaes
