Les distintes folaes migratories d’asturianos y asturianes a lo llargo de la historia dieron como resultáu una abondosa diáspora, miles de compatriotes o descendientes d’ellos que nunca perdieron los venceyos que los xuníen a la so tierra. Estructuraos al traviés de la rede de Centros Asturianos espardíos per tol mundu, nellos espresábase la señardá por tar lloñe del país, faciendo tamién por caltener la so identidá y tresmitila a los sos fíos y nietos. Una seña d’asturianidá tan potente como la música nun podía faltar nes sos actividaes, siendo munches les iniciatives entamaes al so alredor: formación de grupos de bailles, clases de gaita, actuaciones d’artistes del país…
En dellos casos eses actividaes tuvieron como resultáu la formación de bandes de música asturiana/folk que tresmitieron el bagaxe sonoru llariegu d’una manera menos folclórica y estereotipada. Exemplos d’ello son grupos como Fardaxu (Arxentina), Ta Fechu (Chile) o Folixa (Cataluña).
De Barcelona foron Risca l’Alba, una banda que desenvolvió la so actividá nos primeros años del 2000, poco se sabe d’ella más allá de que llegaron a grabar una maqueta con fecha del 2003 con tres temes perconocíos del la música tradicional, la popular y el folk celta. A mediu camín ente l’acusticidá y la lletricidá muestren un soníu cenciellu y llimpiu, una grabación que diba pasar desapercibida dafechu ente’l báramu de bandes y propuestes que nesos años se daben na escena folk asturiana.
/IMA
Suscríbite a les nuestres novedaes
