Arranca’l fin de selmana y fáilo con seis cites cola música’l país na que’l folk y la tradición ye la protagonista. L’axenda entama esti vienres 18 colos conciertos de La Banda Latira en La Puela dientro del Allande Festival y de La Ciudá nel Mar, a les 22.30h na Taberna Narciso de Teberga.
El sábadu 19 entama’l Festival Intercélticu d’Avilés cola so bayurosa programación ente la que s’alcuentra los premios Gausón cola actuación de la Banda Gaites La Tarabica y Mentobardi, la Esbilla de Bandes de Gaites de la Comarca d’Avilés na que participen les d’Esbardu -organizadora del eventu-, La Tarabica y Corvera d’Asturies y, a les 22h, cola Nueche en Danza na que toquen Soi Panderetera, L’Andecha Turcipié, amás d’haber escenariu abiertu. Dambes cites son nel Parque’l Muelle.
Tamién el sábadu ye la presentación del programa del XVIII Festival Internacional de la Gaita de Villaviciosa. L’actu ye a les 18h nel Atenéu Obreru y enantes, a les 16h, hai un taller de caxa d’alta tensión que va dar el percusionista canadiense Ian Morris.
L’axenda complétase’l domingu coles actuaciones de Pau Santirso na Folixa Pola Paz de Xixón (Muséu del Pueblu d’Asturies a les 13h) y de Los Gascones a les 17h en Santana n’El Puerto Marabio (Teberga). Tamién esti día nel F.I.A toquen Los Gascones a les 13h nel Parque’l Muelle; La Tarabica fai dellos pases; Pandereteras de Somiedo actúen a les 20h na Plaza Pedro Menéndez; Orquesta Céltica Asturiana a les 22h na Plaza Pedro Menéndez y DJ Fon-T a les 23.30h nel Parque’l Muelle).
Tola programación detallada d’equí a los próximos meses pue vese na Axenda de Musicasturiana.com.
Suscríbite a les nuestres novedaes
