Que’l baille asturianu ta nun momentu d’espoxigue ye daqué indiscutible. Hai públicu, danzantes, bayura de conciertos, nueches en danza y más eventos rellacionaos col baille’l país; pero entá queda xente con gana baillar cuando los y les músiques baxen del escenariu… y siempre qu’hai gana de daqué, surden proyectos pa dar respuesta a les necesidaes. Asina ye como nació DJ Fon-T, iniciativa del gaiteru, saxofonista y flautista Fabián Fernández (Llanera, 1993), qu’ufre «un serviciu de pinchadiscos» pa poner el ramu a les nueches folk y fáilo amás remocicando daqué les pieces orixinales.
«Garro temes yá grabaos de música folk y tradicional y adáptolos como si fuera pa una Nueche en Danza, poniéndo-yos una velocidá más adecuada pa baillar«, desplica’l tamién componente de La Garrapiella, Los Gascones y Fonte Fuécara. D’esta manera escueye «munches muñeires que tán grabaes a 108 y ye más cómodu pa baillar a 126-130» o dobla «dalguna repetición o frase que quede curtia». Too ello aprovechando «lo que te permite facer la mesa mezcles, buscando tamién dalgún soniducu que mole», añade’l músicu.
«Pel momentu ye too con temes que tán grabaos yá; nun hai nada de producción propia y tampoco ye la idea, porque la gracia d’esto ye qu’un tema que conocemos toos de Llan de Cubel, por exemplu, podamos baillalo bien». Sicasí, reconoz que tien dalgún remix fechu y que ta viendo «cómo orientalo» sorrayando que l’actividá principal ye la de «pinchadiscos» y non facer «música electrónica como otros proyectos qu’hai nel panorama que lo faen fenomenal».
La música’l país ye la protagonista de les sesiones de DJ Fon-T, «anque dependiendo del públicu tamién pue sonar dalgún tema folk d’otros países del Arcu Atlánticu«, comenta’l multiinstrumentista. Amás, el so llabor rescata a formaciones desapaecíes: «Préstame muncho pinchar grupos que yá nun tán n’activo, como Los Ciquitrinos o una montonera d’ellos de los que yá nun puedes disfrutar. Gústame incorporar esos temes que fueron potentes y que munchos sentimos y medramos con ellos»
Con DJ Fon-T la música asturiana algama un formatu nuevu pa que siga sonando nun eventu anque nun haiga naide con un instrumentu enriba d’un escenariu. Tien tola llóxica, porque como diz Fabián Fernández «igual que’l que va a la discoteca y quier baillar música disco, tamién hai xente que quier siguir baillando música más tradicional y orientada al baille cuando yá acaba too». Tres d’estrenase’l pasáu añu na Espicha Fitoria y pinchar nel FolkAyer de Morea y nel Xixón Folk, hai una oportunidá nueva pa ver a esti DJ n’acción. Va ser esti domingu 20 nel Festival Intercélticu d’Avilés y Comarca, a les 23.30h nel Parque’l Muelle.
Suscríbite a les nuestres novedaes
