Nos años de la llamada Transición les organizaciones polítiques publicaben materiales musicales que distribuyíen de mano en mano ente militantes y simpatizantes. Nellos, la llamada canción protesta yera l’elementu central, con intérpretes comprometíos que cantaben testos mui politizaos que llamaben a la movilización. Musicalmente, p’Asturies aquella dómina representa’l surdimientu del Nuevu Canciu Astur, un movimientu que tuvo’l so orixe nun conciertu celebráu nel Pueblu d’Asturies en Xixón nel añu 1975. Al añu siguiente’l cantautor xixonés Carlos Rubiera asoleyaba cola asociación Conceyu Bable‘l que ta consideráu’l primer discu d’aquella escena, un single con dos cantares.
Nel añu 1977, nun momentu d’axitación política y reivindicación de l’autonomía, el Partido Comunista de España ponía en circulación una casete titulada Estatuto de Autonomía. Asturias, na que dellos cantantes del país ufiertaben dalguna de les sos composiciones. Ente ellos taben presentes nomes perbién conocíos como Víctor Manuel, otros poco espardíos como Jorge Morán, dalgún con cierta incidencia daquella como Nel Xiblata y daquién que yá escomenzaben a tener sonadía como Jesús Pedro y Manolo —asina presentaos na cinta—. Estos últimos aportaríen les primeres versiones de dos canciones que diben facer parte más tarde del so primer discu. Hai tamién un par de cortes interpretaos por intérpretes desconocíos, que nun consten nos créitos.
Pocos más datos hai sobre esta casete, mui representativa d’aquel tiempu nel que l’asturianismu modernu daba los primeros pasos, tamién nel so aspectu musical.
Suscríbite a les nuestres novedaes
