El músicu asturianu Rubén Bada va formar parte del espectáculu Celtic Odysée, que se va celebrar nel marcu del festival Celtic Connections 2026 en Glasgow (Escocia). Esta produción musical, que tendrá llugar el 25 de xineru nel emblemáticu City Halls, axunta artistes d’Irlanda, Escocia, Gales, Bretaña, Galicia, y Asturies, creando un viaxe sonoru poles tradiciones céltiques.
Rubén Bada, referente de la música tradicional asturiana y con una trayectoria consolidada nos escenarios de folk y músiques del mundu, forma parte de grupos como L-R, Calea o DRD. Amás, na segunda metá del añu 2025, asoleyó’l que ye’l so primer discu en solitariu. El músicu va amosar nel espectáculu’l ricu patrimoniu musical asturianu, mesturando’l so soníu con otres cultures céltiques.
Celtic Odysée ye un viaxe sonoru dirixíu pol músicu y compositor escocés Calum Stewart que promueve estos alcuentros ente músiques y músicos de distintos llugares célticos. Nel espectáculu d’esti añu, Rubén Bada va actuar al traviés d’unu de los repartos más brillantes, compartiendo escenariu con un elencu internacional d’artistes, ente los que figuren: Ali Hutton (Escocia), Annie Baylis (Cornualles), Elodie Jaffré (Bretaña), Isla Callister (Isla de Man), Jordan Price-Williams (Gales), Kathleen MacInnes (Escocia), Lauren MacColl (Escocia), Liam Roudil (Bretaña), Sophie Stephenson (Escocia), Zoe Conway (Irlanda), Xabier Díaz (Galicia) y Yann Le Bozec (Bretaña), al empar con Bada representando a Asturies.
Celtic Connections ye un festival de referencia mundial, que dende 1994 sirve como puntu d’alcuentru pa músiques tradicionales, folk, raigañu y soníos del mundu, con centenares de conciertos, talleres y eventos culturales que convierten a Glasgow nun epicentru de la música céltica.
Suscríbite a les nuestres novedaes
