La Banda Sonora de Raquel Vega

Raquel Vega Roza (Xixón, 1983) ta venceyada a la cultura tradicional dende’l so nacimientu, porque ye fía del luthier Ánxel Vega y la modista Gloria Roza, ex propietarios y fundadores de la tienda Vezos y Costumes, qu’agora rexenta ella. Participó en grabaciones de discos de Muyeres y Cuerria y collaboró n’espectáculos d’ Hevia, Felpeyu, Amistades Peligrosas, ente otros. Tamién formó parte de grupos como Muyeres, Na Señardá, Vezos Asturies o’l yá inactivu Les Amasueles Moyaes.

Lleva cuasi diez años siendo profesora na Escuela de música tradicional La Quintana de Xixón, tien la so propia escuela de baille y pandereta que lleva’l so nome y tamién punxo clases d’esto na Escuela de Música de Llacín, Trebeyu o los cursos de la Universidá Popular de Xixón. Foi la creadora de la idea de la Nueche en Danza en 2015 y na actualidá ye directora del grupu Soi Panderetera y pertenez al coru Al Altu La Lleva.

Con ella siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Un discu qu’enxamás canses de sentir.

B.S.O de Tarzán, de Phill Colins na qu’una de les canciones ganó un Oscar, un Globo d’Oru y un Grammy.

Si tuvieres que formar parte d’otru proyectu musical, ¿cuál sería?

Sedría d’un proyectu nuevu, que tovía nun naciera, un grupu heavy-rock-tradicional, con temes propios y versiones.

«Prestaríame tocar nun proyectu nuevu, un grupu heavy-rock-tradicional con temes propios y versiones»

De los cantares que compusisti o interpretes, ¿cuál ye’l to preferíu?

Nun sé si pola fuercia cola que cantaba Concha Rodríguez, de Tresmonte, o pola viveza de les sos manes al tocar el pandeiru, una de les pieces que más me presta tocar y cantar acompañada de les mios compañeres, ye una de les xotes qu’ella canta, onde l’estribillu “ahí la tienes bailalá” desafía a les persones que la escuchen.

¿Cuándo foi la primer vez que xubisti a un escenariu y que pasó enantes, durante y depués?

Llevo xubiendo a escenarios dende neña, yá seya pa baillar, cantar o actuar, asina que nun pueo recordar exactamente la primera, pero una de les que más recuerdo foi nel 2003 na Nuit Celtic, nel estadiu de S. Denís de París.

Enantes d’actuar pudi conocer personalmente a Carlos Nuñez, y ver a Sinead o’Connor. L’actuación foi mui emocionante. Tuvimos que xubir a oscures al escenariu, que taba nel mediu del campu, por una trampilla qu’había nel suelu, y sentir a más de 70.000 persones en «silenciu” ye un recuerdu difícil d’esborriar.

¿Qué ye lo más inxusto de ser artista?

La paridá.

«Incluyiría la pandereta y la voz dientro de Conservatoriu, yá que van de la mano dafechu. Algamóse cola gaita va unos años, pero la pandereta sigue considerándose un instrumentu de segunda»

Si fueres Conseyeru de Cultura, ¿qué son les primeres coses que fadríes?

Incluyir la pandereta y la voz dientro de Conservatoriu, yá que van de la mano dafechu. Algamóse cola gaita va unos años, pero la pandereta sigue considerándose un instrumentu de segunda. Amás apostaría por dar espacios adecuaos pal ensayu de grupos.

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Maribel López Parrondo foi y ye una muyer enllena de fuercia, que dedicó la so vida a la recuperación de munches de les canciones tradicionales que conocemos, y podría decir que foi la mio inspiración.

«Pondría BSO a Les aventures de Huckleberry Finn. Na traducción de Mario Baragaño ye divertidísima ver como’l protagonista va topándose nel so viaxe con diferentes personaxes que falen en diferentes dialectos y entonaciones del asturianu»

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Culposamente nengún, pero reconozo que la pachanga encántame.

¿A qué personaxe públicu convidaríes a un conciertu tuyu, a pasar llueu pel backstage y pa qué?

Ana Belén, pa que m’enseñara tolos exercicios que fai enantes de xubir a un escenariu.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Les aventures de Huckleberry Finn. La visión del traductor Mario Baragaño, que fai de los diferentes dialectos del asturianu, ye sublime, y ver como’l protagonista va topándose nel so viaxe con diferentes personaxes que falen en diferentes dialectos y entonaciones del asturianu, paezme que pue ser divertidísima.

Asina fala Raquel Vega de los cantares qu’escoyó pa la so playlist

Garra’l xirón (Lliberdón). Esti grupu yá inactivu foi ún de los más sonaos cuando yera neña, y la sensación de conocer a dalgún componente, tovia lo facía más interesante.

Nun Llores (Dixebra). Cuando siento esti cantar, evócame a les batalles que se formaben a la vera de la casa onde me crié, y onde sentíes la fuercia de tolos trabayadores que lluchaben contra’l pieslle.

Los Fayeos de Mayo (Felpeyu). Imposible nun contar con esti temazu.

Lo Suelto Ayerán (Muyeres).  Tener qu’escoyer una pieza de tol repertoriu de Muyeres, ye mui complicáu. Fini Suarez, la que canta esta pieza, foi una de les más virtuoses tocadores y cantadores, que nos dexó a mui temprana edá.

Pena (Desaniciu). ¿Podría decise que Desaniciu ye ún de los meyores grupos de punk n’asturianu? SÍ, y si enriba ún de los mios collacios pon ritmu y voz, fantasía.

La Neña Pirata (Pop Piquiñin). Gran parte de la mio vida ye la maternidá. Yo crecí con Seliquín o Xentiquina, y les mios neñes tuvieron la gran fortuna de medrar con Pop Piquiñín; nun-yos pueo agradecer más a esti grupu lo fácil que me ficistes la crianza. GRACIES.

Enguedeyu (Skitarna). Esti grupu pocu conocíu, punxo banda sonora a les mañanes de los sábados, porque’l cantante yera’l vecín d’arriba de mio casa na mocedá.

Lamento de Gaitas (Los Archiduques con Tino Casal). Y aquí mio primer amor, Tino Casal. Estos son los comienzos nel grupu de Los Archiduques, que poco dempués dexaría pa escomenzar la so carrera en solitario, la cual foi pa mi SUBLIME.

Te quiero porque te quiero (Rozalén y Rodrigo Cuevas) . Axuntar Asturies y Murcia con estes dos persones, pue que seya de lo meyor.

Cuelebre (Victor Manuel). ¡Anda que no fice los coros de neña a esti temazu!

La Herencia (Mayalde). Esti grupu ye un de los más importantes en munchos sentíos, tien una discografía muy amplia, los conciertos son tremendos y con la suerte de unirnos con la familia una gran amistá.

Madrugaba el Conde Olinos (Joaquín Díaz). LA VOZ. Cada discu que graba esta gran voz, ye un deleite, pionero na recuperación, y con un muséu y archivu n’Urueña, impresionantes.

El Brillante (Eliseo Parra). La mestura de la música tradicional de distintos puntos del mundu, fai qu’esti discu seya ún de los más guapos d’Eliseo Parra. Y la última estrofa d’esta pieza, ye una de les más guapes que yo sentí.

La cuisiniêre (La Bottine Souriante). Emblemáticu grupu del Quebec, onde los recuerdos de los conciertos a los qu’asistí, de los más divertíos que viví.

Time whats Is Time (Blind Guardian). Cuando te críes sintiendo na habitación d’al llau grupos de power metal, indudablemente o los termines odiando o, como ye’l mio casu, asúmeslo como parte de ti.

Too late (Dover). Poco que decir d’esti grupu que marcó una época.

Peces de ciudá (Ana Belén). Nun podía dexar fuera de la banda sonora de mio vida a esta diva. Medré con ella y el so discou de Mucho más que dos.

Son of Man (Phils Collins). La mio debilidá, la percusión, y la batería ente elles, asina que nun podía dexar de mencionar a ún de los meyores bateristes y voces.

Despertar en primavera (Franco Battiato). Si en mio vida hubiese una asignatura troncal, sería ensin dulda Franco Battiato. En castellanu, n’italianu, n’inglés, nun importa.

Chicken Fried (Zac Brown band). Ente tolos estilos musicales, digamos que’l Country, ye de los que más me llama la atención a tolos niveles. Esta banda en mi día a día ye infinita.