Tres del so estrenu nel IV Semando Fest y el conciertu d’hai diez díes na Taberna Narciso de Teberga, la banda nueva hardcore, punk, rap y electrónica, PVXARRA, anuncia les próximes feches de la so xira. Esti vienres 27 van actuar en L’Apiaderu d’El Remediu (Nava), siendo l’últimu conciertu que va acoyer esti Centru Social Autoxestionáu qu’echa’l pieslle por causes ayenes a la so asamblea y qu’anda a la gueta d’un llocal nuevu pela redolada.
A l’actuación del 27 de marzu van siguila otres trés: 25 d’abril nel CSA L’Aviru de Morcín, 23 de mayu nel Lucy Club de Xixón y 6 de xunu en La Traviesa de L’Infiestu. Ye una xira per pequeños aforos y espacios underground que reflexa perbién l’espíritu de la banda y que ta entamada xunto a la so axencia de contratación, Lacre.
PVXARRA ye un tríu formáu pol mentáu Ferla Megía a la producción, Cosme a les lletres y voz y Argu al baxu. La so referencia son grupos como Death Grips, IDLES, Kneecap, Chill Mafia, Aphex Twin y soníos como’l punk, rock n’ast, hardcore o drum&bass; «coses que nos presten y que nos faen sacar la rabia de dientro», desplica Megía sobre esti grupu que naz de la so amistá colos otros dos componentes y de los descartes que l’artista multidisciplinar fixo pal so propiu proyectu. Hasta’l momentu tienen cuatro temes publicaos en plataformes musicales, amás de la maqueta Raspiar, de la qu’agotaron toles unidaes nun día.
Suscríbite a les nuestres novedaes
