Musicasturiana.com ta acabante d’estrenar la web de SIENTI, la guía de la escena musical n’asturianu. Nesta primer versión de la web yá puede consultase la información d’un total de 371 fiches d’Artistes, DJs, espectáculos, agrupaciones de música tradicional, eventos, espacios escénicos, empreses de la industria musical, formación, tiendes, talleres y otros proyectos d’apoyu a la música. Esti directoriu fízose gracies a la collaboración de persones y entidaes que s’apuntaron a la iniciativa nos trés procesos d’inscripción que s’abrieron ente 2024 y 2026. Sicasí, entá falta muncha información pa qu’esti seya’l directoriu más completu de la escena, asina qu’ábrese una convocatoria nueva hasta’l 1 d’ochobre pa que más proyectos formar parte de SIENTI de forma gratuita.
En zarrándose esta convocatoria nueva’l xueves 1 d’ochobre, va actualizase tola información na web www.sienti.me y entamar el procesu de maquetación de la guía física, de la que van editase un mínimo de 2.500 exemplares pa distribuyir per cases de cultura, programadores públicos y privaos, oficines de turismu, stands en feries y congresos culturales, bares, sales, tiendes, públicu y ente tola xente que faiga una aportación económica al proyectu. La fecha de llanzamientu d’esta guía impresa va ser el próximu mes de payares, coincidiendo col novenu aniversariu de musicasturiana.com.
El proyectu de SIENTI nació a finales de 2024 col oxetivu de facer más fácil el trabayu de les distintes persones vinculaes a la industria cultural y tener una utilidá evidente que pue vese con exemplos como estos: “Si soi un programador públicu o priváu: ¿a qué artistes pueo llamar? ¿con quién contrato l’equipu de soníu?… Si soi públicu: ¿qué grupos hai? ¿a qué festivales pueo dir?. Si soi artista: ¿en qué sales pueo tocar? ¿quién pue grabame un videoclip?. Si quiero ser parte d’esta escena: ¿en qué escuela deprendo a tocar un instrumentu?. D’esta manera, empreses, profesionales, artistes, asociaciones, instituciones… van poder apaecer y consultar estes “páxines amarielles” de la música asturiana pa desendolcar meyor el so llabor.
Otru de los puntos fuertes de SIENTI ye que sirve p’amosar nun únicu catálogu tola vitalidá de la escena musical asturiana y p’ayudar a esportar la música d’equí, amás de crear públicu. Ye asina un recursu afayadizu pa poder representar a Asturies n’eventos internacionales como’l Womex, Fitur, BIME, Lorient… D’esta miente da soluciones a dalgunes carencies que tien la industria musical asturiana como la falta de visibilidá y el desconocimientu; la poca información y la interrellación ente axentes; les dificultaes de representación; y la desigualdá respecto a otros territorios y sectores.
Enllenando los formularios de caúna de les sos estayes na web www.sienti.me. Na so vocación de representar tolo que se puea a la escena, SIENTI nun va cobrar a quien quiera apaecer nel so directoriu. Sicasí, llanzó unes cuotes de sofitu pa que se puea collaborar económicamente con esta guía que quier tener una amplia distribución. Tamién hai la posibilidá d’anunciase con publicidá de dellos formatos nes páxines de la publicación.
Con esta iniciativa, Musicasturiana.con sigue percorriendo’l camín de trabayar en defensa de la música n’asturianu. El proyectu nació en 2017 y anguaño ye un mediu de comunicación, tienda online, distribuidora dixital y axente dinamizador de la escena. Ente les sos cifres destaquen más de 50.000 llectores anuales; más de 19.000 siguidores en redes sociales; más de 1.300 clientes; más de 5.000 referencies vendíes; y más de 70 países alcanzaos. Ye una empresa seria y constante que con SIENTI da un pasu más na so xera d’entamar otros proyectos paralelos, como son el d’Amosando y Semando Fest.
Suscríbite a les nuestres novedaes
