A finales de 2024, Musicasturiana.com anunció la creación de SIENTI. La guía de musicasturiana.com, un directoriu físicu y dixital que quier ser la guía más completa de la industria musical d’equí. Tres de tener que paralizar el proyectu por delles causes, el procesu continúa agora nel puntu onde quedó paráu l’añu pasáu, cola intención de que SIENTI s’asoleye esti branu.
En SIENTI tienen espaciu artistes, agrupaciones, instituciones, empreses, profesionales que tean venceyaos a esta escena d’una manera (realización audiovisual, estudios de grabación, espacios escénicos, festivales, promotores, diseñu gráficu, alquiler de soníu….). Pue apaecese na guía de forma gratuita y pa ello la xente interesao namás tien qu’enllenar esti breve formulariu: https://forms.gle/y4hCoTVtC4fzrbgH8. Güei ye l’últimu día pa completalu (quien yá lu rellenara nun fai falta que lu rellene otra vuelta).
SIENTI quier facer más fácil el trabayu de les distintes persones vinculaes a la industria cultural y va tener una utilidá evidente que pue vese con exemplos como estos: “Si soi un programador públicu o priváu: ¿a qué artistes pueo llamar? ¿con quién contrato l’equipu de soníu?… Si soi públicu: ¿qué grupos hai? ¿a qué festivales pueo dir?. Si soi artista: ¿en qué sales pueo tocar? ¿quién pue grabame un videoclip?. Si quiero ser parte d’esta escena: ¿en qué escuela deprendo a tocar un instrumentu?. D’esta manera, empreses, profesionales, artistes, asociaciones, instituciones… van poder apaecer y consultar estes “páxines amarielles” de la música asturiana pa desendolcar meyor el so llabor.
Otru de los puntos fuertes de SIENTI ye que sirve p’amosar nun únicu catálogu tola vitalidá de la escena musical asturiana y p’ayudar a esportar la música d’equí, amás de crear públicu. Ye asina un recursu afayadizu pa poder representar a Asturies n’eventos internacionales como’l Womex, Fitur, BIME, Lorient… D’esta miente da soluciones a dalgunes carencies que tien la industria musical asturiana como la falta de visibilidá y el desconocimientu; la poca información y la interrellación ente axentes; les dificultaes de representación; y la desigualdá respecto a otros territorios y sectores.
¿Cómo apaecer en SIENTI?
Quien quiera apaecer en SIENTI namás tien qu’enllenar esti primer breve formulariu güei como últimu día (quien yá lo completara nun fai falta que lu rellene otra vuelta). Una vez recibío, Musicasturiana.com va unviar un segundu formulariu a cada axente inscritu parecoyer más información detallada de cada proyectu. Van poder rexistrase proyectos que pertenezan a dalguna d’estes categoríes: artistes; agrupaciones de música tradicional; festivales / eventos; espacios escénicos y bares; formación; empreses de la industria musical; empreses pa eventos y espectáculos; otres empreses d’apoyu a la música; tiendes y talleres.
Na so vocación de representar tolo que se puea a la escena, SIENTI nun va cobrar a quien quiera apaecer nel so directoriu. Sicasí, llanzó unes cuotes de sofitu pa que se puea collaborar económicamente con esta guía que quier tener una amplia distribución, con una tirada d’ente 1.000 y 3.0000 exemplares. Tamién hai la posibilidá d’anunciase con publicidá de dellos formatos nes páxines de la publicación.
Con esta iniciativa, Musicasturiana.con sigue percorriendo’l camín de trabayar en defensa de la música n’asturianu. El proyectu nació en 2017 y anguaño ye un mediu de comunicación, tienda online, distribuidora dixital y axente dinamizador de la escena. Ente les sos cifres destaquen más de 50.000 llectores anuales; más de 19.000 siguidores en redes sociales; más de 1.300 clientes; más de 5.000 referencies vendíes; y más de 70 países alcanzaos. Ye una empresa seria y constante que con SIENTI da un pasu más na so xera d’entamar otros proyectos paralelos, como son el d’Amosando y Semando Fest.
Suscríbite a les nuestres novedaes
